ភ្នំពេញ៖ នៅថ្ងៃទី១៣ ខែវិច្ឆិកា ឆ្នាំ២០២៦នេះ , ថ្ងៃនេះ ព្រះរាជាណាចក្រកម្ពុជា បានសម្ពោធ បើក​ឱ្យ​ដំណើរការជាផ្លូវការនូវ “ភូមិហ្វ្រង់កូហ្វូនី» នៅសួនច្បារវត្តបទុមវតី ដែលជា​ព្រឹត្តិការណ៍​ប្រវត្តិសាស្ត្រ និងជាព្រឹត្តិការណ៍អមដ៏សំខាន់នៃកិច្ចប្រជុំកំពូលហ្វ្រង់កូហ្វូនីលើកទី២០។ ពិធី​សម្ពោធ​បើក​ដ៏​អធិកអធម នេះ ប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ សម្តេចមហា​បវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ព្រមជាមួយវត្តមានរបស់ លោកជំទាវ Louise Mushikiwabo អគ្គលេខាធិការ​នៃ​អង្គការអន្តរជាតិ ហ្វ្រង់កូហ្វូនី (OIF)។

នៅក្នុងសុន្ទរកថាបើក សម្តេចធិបតីនាយករដ្ឋមន្ត្រី បានគូសបញ្ជាក់ពីសារៈសំខាន់ជា ប្រវត្តិសាស្ត្រ​នៃ​​ព្រឹត្តិការណ៍នេះ ដោយមានប្រសាសន៍ថា នេះជាលើកទីមួយហើយដែលកម្ពុជាធ្វើជា ម្ចាស់​ផ្ទះ​រៀប​ចំកិច្ចប្រជុំកំពូលនេះ ហើយក៏ជាការវិលត្រឡប់មកកាន់តំបន់អាស៊ីអាគ្នេយ៍ជាលើកដំបូង បន្ទាប់​ពីកិច្ចប្រជុំនៅទីក្រុងហាណូយក្នុងឆ្នាំ១៩៩៧។ ឆ្លុះបញ្ចាំង​ពីមូល​បទគោលរបស់​កិច្ច​ប្រជុំ​កំពូល​ ស្តីពី «ការបន្តកសាងសន្តិភាព ដើម្បីវិបុលភាពរួម និងស្ថិរភាពយូរអង្វែង» សម្តេចធិបតី បាន​រំលេច ពីមូលបទរបស់ភូមិហ្វ្រង់កូហ្វូនីគឺ៖«ស្នាមញញឹមខ្មែរ ស្នាមញញឹមហ្វ្រង់កូហ្វូនី»។

សម្តេចធិបតី មានប្រសាសន៍បញ្ជាក់ថា «នៅកម្ពុជា ស្នាមញញឹម​មិន​មែន​ត្រឹម​តែ​ជា​ការ​ស្វាគមន៍​នោះ​ទេ។ ស្នាមញញឹម តំណាងឱ្យភាពកក់ក្តៅ និងសន្តិភាព»។

លោកជំទាវ Louise Mushikiwabo បានសម្តែងនូវការដឹងគុណយ៉ាងជ្រាលជ្រៅចំពោះ រាជ​រដ្ឋាភិបាលកម្ពុជា សម្រាប់ការបដិសណ្ឋារកិច្ចដ៏កក់ក្តៅ និងការរៀបចំយ៉ាងល្អឥតខ្ចោះ។ លោក​ជំទាវ បានអបអរសាទរចំពោះការផ្លាស់ប្តូរវប្បធម៌ដ៏សម្បូរបែប ដែលបា​ន​ស្តែង​ចេញ​នៅ​ក្នុង​ពិធីបើក ជាពិសេស ការជួបគ្នារវាងវប្បធម៌កម្ពុជា និងរវ៉ាន់ដា នៅលើឆាកតែមួយ។ លោកជំទាវ បា​ន​គូសបញ្ជាក់ថាទោះបីជា មានចម្ងាយភូមិសាស្ត្រឆ្ងាយពីគ្នាក៏ដោយ ប្រជាជាតិ​ទាំង​ពីរ​ពិត​ជា​មានភា​ពធន់ (resilience) ដ៏គួរឱ្យ ស្ញប់ស្ញែង និងមានបំណងប្រាថ្នា​រួម​គ្នា​ក្នុង​ការ​កសាង​អនាគត​មួយ​ប្រកប​ដោយសន្តិភាព និងវិបុលភាព។

លោកជំទាវកិត្តិបណ្ឌិត អ៊ុង កន្ថាផាវី រដ្ឋមន្ត្រីក្រសួងកិច្ចការនារី និងជាប្រធានអនុគណៈ កម្មការទី៥ បានធ្វើបទបង្ហាញអំពី «ភូមិហ្វ្រង់កូហ្វូនី» ថាជាទី​កន្លែង​ដ៏​រស់​រវើក​សម្រា​ប់​ការ​ស្វែង​យល់​ ការផ្លាស់ប្តូរវប្បធម៌ និងកិច្ចសហប្រតិបត្តិការ ដោយផ្តោត​យ៉ាង​ខ្លាំង​ទៅ​លើ​បរិយាបន្ន​សម្រាប់មនុស្ស គ្រប់រូបជាពិសេសស្ត្រី និងយុវជន។ លាតសន្ធឹងលើផ្ទៃដីប្រមាណ ១០.០០០ ម៉ែត្រ​ការ៉េ ភូមិនេះទទួល ស្វាគមន៍ភ្ញៀវទេសចរណ៍តាមរយៈខ្លោងទ្វារដ៏ធំសម្បើម ដែល​ចម្លង​ចេញ​ពី​រចនាបថខ្លោងទ្វារទន្លេអុំនៃ រាជធានីអង្គរធំ តំណាងឱ្យមេត្តាករុណា និងសន្តិភាពផ្លូវចិត្ត អមដោយរូបព្រាបសតំណាងឱ្យភាព សុខដុមរមនា។

នៅក្នុងភូមិមានរៀបចំ ពន្លាជាតិចំនួន ៧៣ តំណាងឱ្យប្រទេស និងដៃគូហ្វ្រង់កូហ្វូនី, ស្តង់​ពិព័រណ៍ ​ចំនួន ១៣០ បង្ហាញពីគំនិតផ្តួចផ្តើមរបស់ស្ថាប័ននិងធុរកិច្ច, និងភូមិម្ហូបអាហារចំនួន ៣០ ស្តង់ ដែល ផ្តល់ជូននូវរសជាតិអាហារចម្រុះមកពីជុំវិញពិភពហ្វ្រង់កូហ្វូនី។ ក្នុងរយៈពេល ៥ ថ្ងៃ ទីតាំងនេះក៏នឹងធ្វើជា ម្ចាស់ផ្ទះរៀបចំសន្និសីទ និងកិច្ចពិភាក្សាតុមូលចំនួន ៣០ កម្មវិធី ព្រមទាំងការសម្តែងសិល្បៈនិង វប្បធម៌ ចំនួន ៥០ កម្មវិធីផងដែរ។

«ភូមិហ្វ្រង់កូហ្វូនី» បើកទ្វារស្វាគមន៍សាធារណជនឱ្យចូលទស្សនាដោយសេរី ចាប់ពីថ្ងៃទី១៣ ដល់ថ្ងៃទី១៧ ខែវិច្ឆិកា ឆ្នាំ២០២៦។ ព្រឹត្តិការណ៍នេះត្រូវបានរំពឹងថានឹងទទួលស្វាគមន៍ភ្ញៀវជាតិ និងអន្តរជាតិប្រមាណ ១០០.០០០ នាក់ ដែលនឹងរួមចំណែកក្នុងការជំរុញភាពជាដៃគូថ្មីៗ ចំណងមិត្តភាព និងការពង្រឹងសាមគ្គីភាពនៃសហគមន៍ហ្វ្រង់កូហ្វូនី៕