អាមេរិក៖ មន្ត្រីមួយរូបរបស់សហរដ្ឋអាមេរិក បាននិយាយកាលពីថ្ងៃអង្គារថា កាលពីថ្ងៃអាទិត្យកន្លងទៅ កូរ៉េខាងជើងបានបាញ់មីស៊ីល ២គ្រាប់រយៈពេលប៉ុន្មានថ្ងៃប៉ុណ្ណោះ ក្រោយដំណើរបំពេញទស្សនកិច្ចមកកាន់តំបន់នេះ ដោយមន្ត្រីជាន់ខ្ពស់ការបរទេស និងការពារជាតិអាមេរិក ហើយវាគឺជាការប្រឈមដំបូងគេរបស់ទីក្រុងព្យុងយ៉ាង ជាមួយរដ្ឋបាលថ្មីរបស់លោកប្រធានាធិបតី ចូ បៃដិន។
មន្ត្រីរូបនោះអះអាងថា មីស៊ីល ២គ្រាប់បានបាញ់ចេញកាលពីថ្ងៃអាទិត្យ ក្នុងកាយវិការដូចកាលពីមុន ជាពេលដែលទីក្រុងព្យុងយ៉ាង ប្រើប្រាស់ការសាកល្បងមីស៊ីលរបស់ខ្លួន ដើម្បីបង្កហេតុជាមួយទីក្រុងវ៉ាស៊ីនតោន និងទីក្រុងសេអ៊ូល។ ស្របពេលដែលមន្ត្រីរូបនោះមិនបានរៀបរាប់ពីប្រភេទមីស៊ីល កាសែត Washington Post បានរាយការណ៍ថា វាគឺជាមីស៊ីលរយៈចម្ងាយជិត។ ការបាញ់មីស៊ីលនេះដែរបានកើតមានឡើង ក្រោយរបាយការណ៍ចារកិច្ចព្រមានថា ទីក្រុងព្យុងយ៉ាងអាចនឹងត្រៀមបាញ់មីស៊ីលរបស់ពួកគេ។
វាបានកើតឡើងផងដែររយៈពេលប៉ុន្មានថ្ងៃប៉ុណ្ណោះ ក្រោយពេលរដ្ឋមន្ត្រីក្រសួងការបរទេសអាមេរិក លោក អាន់ថូនី ប្ល៊ីនគិន និងរដ្ឋមន្ត្រីការពារជាតិអាមេរិក លោក ឡយ អូស្ទីន បំពេញទស្សនកិច្ចទៅកាន់កូរ៉េខាងត្បូង និងជប៉ុន ដើម្បីពិភាក្សាការងារជាមួយសម្ព័ន្ធមិត្តរបស់ពួកគេ លើបញ្ហាសន្តិសុខក្នុងតំបន់ ដែលគេមើលឃើញថា ប្រទេសប្រដាប់ដោយអាវុធនុយក្លេអ៊ែរ កូរ៉េខាងជើង នៅតែជាការគំរាមកំហែងខ្លាំងដដែល៕
អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
