អំឡុងពិព័រណ៍នវានុវត្តន៍ នៅក្នុងព្រឹត្តិការណ៍អមហ្រ្វង់កូតិច ក្រុមហ៊ុនធុរកិច្ច និងស្ថាប័នដែលកំពុងប្រតិបត្តិការក្នុងវិស័យបច្ចេកវិទ្យាឌីជីថលជាច្រើន ទាំងក្នុងប្រទេសកម្ពុជា និងមកពីបណ្តាប្រទេសនានា បានជួបជុំគ្នា ដើម្បីបង្ហាញស្នាដៃ ផលិតផល សេវាកម្ម និងដំណោះស្រាយបច្ចេកវិទ្យាថ្មីៗរបស់ខ្លួន។
ពិព័រណ៍នេះមិនត្រឹមតែជាវេទិកាសម្រាប់អ្នកប្រកបធុរកិច្ចបង្ហាញសមត្ថភាព និងផលិតផលប៉ុណ្ណោះទេ ប៉ុន្តែក៏ជាឱកាសសម្រាប់សាធារណជន ជាពិសេសយុវជន និងអ្នកចាប់អារម្មណ៍លើបច្ចេកវិទ្យា បានស្វែងយល់កាន់តែច្បាស់អំពីការវិវឌ្ឍនៃបច្ចេកវិទ្យាឌីជីថល និងការអនុវត្តជាក់ស្តែងរបស់វាក្នុងជីវភាពប្រចាំថ្ងៃ និងវិស័យធុរកិច្ច។ តាមរយៈស្តង់តាំងបង្ហាញនីមួយៗ អ្នកទស្សនាអាចសាកសួរព័ត៌មាន ស្វែងយល់ពីមុខងារផលិតផល និងទទួលបានបទពិសោធន៍ផ្ទាល់ពីដំណោះស្រាយបច្ចេកវិទ្យាថ្មីៗ។
តំណាងក្រុមហ៊ុននៅក្នុងស្រុក និងបារាំង លើកឡើងថាការជួបផ្គូផ្គងធុរកិច្ចរវាងក្រុមហ៊ុន និងក្រុមហ៊ុន ដើម្បីស្វែងរកដៃគូសហការ ផ្លាស់ប្តូរបទពិសោធន៍ និងស្វែងរកឱកាសពង្រីកទីផ្សារទៅកាន់ប្រទេសផ្សេងៗផងដែរ។
តាមរយៈបទសម្ភាសន៍ទាំងនេះ អ្នកចូលរួមបានបង្ហាញពីសារៈសំខាន់នៃការជួបជុំ និងការផ្លាស់ប្តូរចំណេះដឹងរវាងអ្នកជំនាញ និងក្រុមហ៊ុនមកពីប្រទេសផ្សេងៗ ដែលអាចបង្កើតជាទំនាក់ទំនងថ្មី និងបើកឱកាសសម្រាប់ការសហការនាពេលអនាគត។ ជាពិសេស ការចូលរួមរបស់ក្រុមហ៊ុនបរទេស ក៏ជាឱកាសមួយក្នុងការស្វែងយល់ពីបរិយាកាសធុរកិច្ច និងលទ្ធភាពនៃការវិនិយោគក្នុងវិស័យបច្ចេកវិទ្យានៅកម្ពុជា៕ អត្ថបទ៖ ស៊ូ ជីង














