សហរដ្ឋអាមេរិក និងអ៊ីរ៉ង់ បានបាញ់តបតគ្នាកាលពីថ្ងៃអង្គារ ដោយអាមេរិកបានវាយប្រហារទីតាំងបាញ់មីស៊ីលរបស់អ៊ីរ៉ង់ បន្ទាប់ពីអ៊ីរ៉ង់បានអះអាងថា ខ្លួនបានវាយប្រហារប្រព័ន្ធរ៉ាដាយោធារបស់អាមេរិកក្នុងប្រទេសបារ៉ែនទោះបីជាមានការចរចារវាងអ៊ីរ៉ង់ និងភាគីសម្របសម្រួលគឺប្រទេសអូម៉ង់ និងកាតាក៏ដោយ។
ការប៉ះទង្គិចគ្នាទៅវិញទៅមករវាងសហរដ្ឋអាមេរិក និងអ៊ីរ៉ង់ចុងក្រោយនេះ បានរំលឹកឱ្យឃើញពីការលំបាកក្នុងការបញ្ចប់សង្គ្រាមអូសបន្លាយជិត ៩ ខែមកហើយ ដែលបានធ្វើឱ្យតំបន់មជ្ឈិមបូព៌ាធ្លាក់ចូលក្នុងអស្ថិរភាព ធ្វើឱ្យតម្លៃថាមពលសកលកើនឡើង និងបង្កឱ្យមានការខឹងសម្បារក្នុងចំណោមអ្នកបោះឆ្នោតអាមេរិកក្នុងការបោះឆ្នោតពាក់កណ្ដាលអាណត្តិកាលពីដើមខែវិច្ឆិកានេះ ដែលជាហេតុនាំឱ្យគណបក្សសាធារណរដ្ឋរបស់ប្រធានាធិបតី ដូណាល់ ត្រាំ បរាជ័យ។
មន្ត្រីយោធាអាមេរិកម្នាក់ ដែលសុំមិនបញ្ចេញឈ្មោះ បាននិយាយថា យន្តហោះចម្បាំងអាមេរិកបានបើកការវាយប្រហារលើទីតាំងបាញ់មីស៊ីលរបស់កងកម្លាំងឆ្មាំបដិវត្តន៍អ៊ីរ៉ង់នៅលើកោះ កេសិម(Qeshm) ក្នុងច្រកសមុទ្រ Hormuz ជាការឆ្លើយតបទៅនឹងការឈ្លានពានរបស់អ៊ីរ៉ង់ ដែលកំណត់គោលដៅលើបុគ្គលិក និងទ្រព្យសម្បត្តិរបស់អាមេរិក។ ទីភ្នាក់ងារសារព័ត៌មានអ៊ីរ៉ង់ ដោយដកស្រង់សម្តីមន្ត្រីអ៊ីរ៉ង់ម្នាក់ បានរាយការណ៍ថា ការវាយប្រហាររបស់សហរដ្ឋអាមេរិកពុំបានបង្កការខូចខាតដល់ហេដ្ឋារចនាសម្ព័ន្ធឡើយ។
កងកម្លាំងឆ្មាំបដិវត្តន៍អ៊ីរ៉ង់បាននិយាយកាលពីថ្ងៃអង្គារថា ពួកគេបានកំណត់គោលដៅវាយប្រហារលើប្រព័ន្ធរ៉ាដាយោធារបស់អាមេរិក នៅឯមូលដ្ឋាន Sheikh Isa ក្នុងប្រទេសបារ៉ែន និងបានព្រមានបារ៉ែនផងដែរ ពាក់ព័ន្ធនឹងសម្ព័ន្ធភាពរបស់ខ្លួនជាមួយសហរដ្ឋអាមេរិក និងជំហររបស់ខ្លួនចំពោះក្រុមបព្វជិតនិកាយស៊ីអ៊ីត (Shi'ite)។
បារ៉ែន ដែលជាទីតាំងនៃទីបញ្ជាការកងនាវាទី ៥ របស់អាមេរិក បានបញ្ជាក់ថា ខ្លួនបានស្ទាក់ចាប់ការវាយប្រហារនោះ ហើយពុំមានសេចក្តីរាយការណ៍អំពីការបាត់បង់ជីវិត ឬការខូចខាតណាមួយឡើយ។
លោក Majed Al Ansari អ្នកនាំពាក្យរបស់ប្រទេសកាតា បាននិយាយថា មន្ត្រីមកពីកាតា និងអ៊ីរ៉ង់បានជួបពិភាក្សាគ្នាកាលពីថ្ងៃអង្គារ ក្នុងគោលបំណងកាត់បន្ថយគម្លាតរវាងសំណើដែលបានដាក់ចេញ ដើម្បីឈានឆ្ពោះទៅរកការបញ្ចប់សង្គ្រាមនេះ ៕


