ភ្នំពេញ៖ អ្នកជំនាញសេដ្ឋកិច្ចមើលឃើញថា កិច្ចប្រជុំកំពូលហ្វ្រង់កូហ្វូនី ដែលកម្ពុជាទើបបញ្ចប់ការធ្វើជាម្ចាស់ផ្ទះ បានរួមចំណែកលើកកម្ពស់មុខមាត់កម្ពុជាលើឆាកអន្តរជាតិ និងបង្កើតឱកាសថ្មីៗក្នុងការពង្រីកកិច្ចសហប្រតិបត្តិការសេដ្ឋកិច្ចជាមួយបណ្តាប្រទេសជាសមាជិក។ ជាក់ស្តែង កម្ពុជាបានចុះហត្ថលេខាលើកិច្ចព្រមព្រៀង និងកិច្ចសហប្រតិបត្តិការជាច្រើន ជាពិសេសលើវិស័យរ៉ែ និងថាមពល ដែលអាចជួយទាក់ទាញការវិនិយោគ និងជំរុញការអភិវឌ្ឍសេដ្ឋកិច្ចជាតិ។

លោកបណ្ឌិត ជ័យ តិច អ្នកស្រាវជ្រាវការអភិវឌ្ឍសង្គម-សេដ្ឋកិច្ច បានឱ្យដឹងថា ការរៀបចំកិច្ចប្រជុំកំពូលហ្វ្រង់កូហ្វូនីនៅកម្ពុជាបានធ្វើឱ្យកម្ពុជាកាន់តែមានភាពលេចធ្លោ និងទទួលបានការចាប់អារម្មណ៍ពីសហគមន៍អន្តរជាតិ។ ជាពិសេស កម្ពុជាបានបង្ហាញពីសមត្ថភាពក្នុងការរៀបចំព្រឹត្តិការណ៍អន្តរជាតិធំៗ ដោយធានាបាននូវសន្តិភាព សន្តិសុខ និងសុវត្ថិភាព។
លោកបណ្ឌិតបន្តថា ក្រៅពីការពង្រឹងទំនាក់ទំនងការទូត កិច្ចប្រជុំនេះក៏បានបើកឱកាសឱ្យកម្ពុជាពង្រីកកិច្ចសហប្រតិបត្តិការលើវិស័យជាច្រើន រួមមាន វិស័យអប់រំ វប្បធម៌ ពាណិជ្ជកម្ម និងការវិនិយោគ ជាពិសេសលើវិស័យដែលមានសក្តានុពល ដូចជា រ៉ែ ថាមពល និងកសិកម្ម។

បើតាមលោកបណ្ឌិត ក្នុងឱកាសនេះ កម្ពុជាបានចុះហត្ថលេខាលើកិច្ចព្រមព្រៀង និងកិច្ចសហប្រតិបត្តិការជាមួយសាធារណរដ្ឋបារាំងចំនួន ២៩ កិច្ចព្រមព្រៀង ជាមួយប្រទេសរវ៉ាន់ដាចំនួន៣ និងប្រទេសកាណាដាចំនួន ២។ លើសពីនេះ ក៏មានការត្រៀមរៀបចំសេចក្តីព្រាងកិច្ចព្រមព្រៀងថ្មីចំនួន ២ បន្ថែមទៀតផងដែរ។ លោកបណ្ឌិតបានចាត់ទុកថា លទ្ធផលនៃកិច្ចសហប្រតិបត្តិការទាំងនេះ គឺជាផ្លែផ្កាមួយដែលកម្ពុជាទទួលបានពីការធ្វើជាម្ចាស់ផ្ទះកិច្ចប្រជុំកំពូលហ្វ្រង់កូហ្វូនី ក្រោមការដឹកនាំរបស់សម្តេចធិបតី ហ៊ុន ម៉ាណែត។
លោកបណ្ឌិត ជ័យ តិច អ្នកស្រាវជ្រាវការអភិវឌ្ឍសង្គម-សេដ្ឋកិច្ច មានប្រសាសន៍ថា «កិច្ចប្រជុំហ្វ្រង់កូហ្វូនីនៅកម្ពុជាដែលទើបតែបញ្ចប់ កម្ពុជាទាក់ទាញបាននូវចំណាប់អារម្មណ៍ទៅលើការរឹតចំណងផ្នែកការទូត ផ្នែកអប់រំ វប្បធម៌ ជាពិសេស ការវិនិយោគ និងពាណិជ្ជកម្ម ទៅលើវិស័យសំខានៗ ដូចជា វិស័យរ៉ែ និងថាមពល, វិស័យកសិកម្ម និងការនាំចេញនាំចូលរបស់កម្ពុជា ជាដើម»។
ជាក់ស្តែង បារាំងបានផ្តល់ជំនួយជាង ២០០លានដុល្លារអាម៉េរិក សម្រាប់វិស័យថាមពលនៅកម្ពុជា។ ជាមួយគ្នានេះ ក្រុមហ៊ុនបារាំង EDF និងអគ្គិសនីកម្ពុជា (EDC) ក៏បានចុះហត្ថលេខាលើកិច្ចព្រមព្រៀងសិក្សាលទ្ធភាពវិនិយោគរួមគ្នា លើគម្រោងសាងសង់វារីអគ្គិសនីថ្មីមួយ ដែលមានសមត្ថភាពផលិតថាមពល ៨០០មេហ្គាវ៉ាត់ នៅខេត្តកោះកុង។ គម្រោងនេះមានតម្លៃវិនិយោគប៉ាន់ស្មានចន្លោះពី ៧០០ ទៅ ៩០០លានដុល្លារអាម៉េរិក និងត្រូវបានរំពឹងថានឹងផ្តល់អត្ថប្រយោជន៍ដល់វិស័យថាមពលកម្ពុជានាពេលអនាគត។
សូមបញ្ជាក់ថា ពិធីចុះហត្ថលេខាលើកិច្ចព្រមព្រៀងសិក្សាលទ្ធភាពវិនិយោគគម្រោងវារីអគ្គិសនីនេះ បានធ្វើឡើងកាលពីថ្ងៃទី១៥ ខែវិច្ឆិកា ឆ្នាំ២០២៦ នៅវិមានសន្តិភាព រវាងលោក កែវ រតនៈ រដ្ឋមន្ត្រីក្រសួងរ៉ែ និងថាមពល ជាមួយតំណាងភាគីបារាំង ក្រោមអធិបតីភាពរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោក Emmanuel Macron ប្រធានាធិបតីបារាំង៕
