ឆ្នាំ២០២៦នេះ នៅរាជធានីភ្នំពេញ មិនមានការប្រារព្ធ ព្រះរាជពិធីបុណ្យអុំទូកនោះទេ ប៉ុន្តែនៅតាមខេត្តមួយចំនួនគឺមានការប្រារព្ធ ដែលព្រឹត្តិការណ៍នោះ គឺបានទាក់ទាញភ្ញៀវបរទេសនានា មានក្តីសប្បាយរីករាយ ហើយនឹងនាំគ្នាអញ្ជើញទៅទស្សនាព្រឹត្តិការណ៍ប្រណាំងទូកនៅតាមបណ្តាខេត្ត ជាមួយប្រជាពលរដ្ឋខ្មែរ ដើម្បីអបអរសាទរ ព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ ដែលនឹងឈានចូលមកដល់ថ្ងៃទី២៣ ខែវិច្ឆិកា ដើមសប្តាហ៍ក្រោយនេះ។

ភ្ញៀវបរទេស មកពីតាមប្រទេសនានា បានថ្លែងប្រាប់BTV នៅថ្ងៃទី១៩ ខែវិច្ឆិកានេះថា នៅពេលនេះ គឺបានត្រៀមខ្លួនរួចហើយ ការអញ្ជើញដើរកម្សាន្តទេសចរណ៍ និងចូលរួមទស្សនាការប្រណាំងទូកនៅតាមខេត្តមួយចំនួនជាពិសេស នៅខេត្តសៀមរាប បំណងទទួលយកបទពិសោធន៍ថ្មីៗ ចង់ស្គាល់អត្តសញ្ញាណប្រពៃណីវប្បធម៌ និងស្នាមញញឹមដ៏រស់រវើកនៃប្រជាជនកម្ពុជានៅតាមបណ្តាខេត្តនានា។
តាមសេចក្តីជូនដំណឹងក្រសួងទេសចរណ៍ បានឲ្យដឹងថា ក្នុងឱកាសព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក នឹងប្រព្រឹត្តទៅ រយៈពេល៣ថ្ងៃ ចាប់ពីថ្ងៃទី២៣ ដល់ថ្ងៃទី២៥ ខែវិច្ឆិកា ឆ្នាំ២០២៦នេះ ក្រសួងទេសចរណ៍ បានណែនាំដល់ ប្រតិបត្តិករទេសចរណ៍ត្រូវផ្តល់កិច្ចសហការល្អជាមួយអាជ្ញាធរមានសមត្ថកិច្ចគ្រប់ជាន់ថ្នាក់ ដើម្បីធានារក្សាសន្តិសុខ សុវត្ថិភាព សណ្តាប់ធ្នាប់សាធារណៈ និងរក្សាឱ្យបាននូវអនាម័យ ព្រមទាំងសោភណភាពតាម មូលដ្ឋានអាជីវកម្ម។ តាមមូលដ្ឋានអាជីវកម្ម ត្រូវរៀបចំតុបតែងលម្អអំពូលភ្លើងបំភ្លឺ និងដាក់បង្ហាញទង់ជាតិ ដាក់តាំងព្រះឆាយាល័ក្ខណ៍ និងរៀបចំតាំងបង្ហាញអំពី វប្បធម៌ខ្មែរ អត្តសញ្ញាណខ្មែរ ឬអត្តសញ្ញាណរបស់រាជធានី ខេត្ត ។
បន្ថែមលើនេះតាមមូលដ្ឋានអាជីវកម្ម ក៏ត្រូវបង្ហាញផលិតផល ឬសេវាកម្មអាជីវកម្មជាសាធារណៈតាមគ្រប់ទម្រង់ និងត្រូវបញ្ជាក់ពីតម្លៃ និងលក្ខខណ្ឌអនុវត្តផ្សេងៗឱ្យបានច្បាស់លាស់ ដែលចាំបាច់សម្រាប់ជាមូលដ្ឋានដល់ភ្ញៀវក្នុងការពិចារណា ជ្រើសរើសទិញផលិតផលទេសចរណ៍ ឬប្រើប្រាស់សេវាកម្មទេសចរណ៍ ហើយត្រូវរក្សាតម្លៃផលិតផល ឬសេវាកម្មឱ្យបានសមរម្យ និងពង្រឹងគុណភាពសេវាកម្មទេសចរណ៍ ឱ្យកាន់តែល្អប្រសើរជាដើម។
តាមអាជីវកម្ម ត្រូវក្រើនរំលឹកអំពីសីលធម៌ សុជីវធម៌ និងអភិវឌ្ឍន៍សមត្ថភាពបុគ្គលិកអំពីការផ្តល់សេវាល្អ បដិសណ្ឋារកិច្ចល្អ និងជំនាញដែលចាំបាច់ពាក់ព័ន្ធនឹងអាជីវកម្មសេវាកម្មទេសចរណ៍ ព្រមទាំង រៀបចំឱ្យបុគ្គលិកមានឯកសណ្ឋានត្រឹមត្រូវទៅតាមផ្នែកនីមួយៗ ជាពិសេសស្នើសុំឱ្យមានការរំលេចលក្ខណៈជាខ្មែរ៕ អត្ថបទ ស៊ុម សុខជា





