ភ្នំពេញ៖ កម្ពុជា-វៀតណាម នឹងជំរុញឲ្យដំណើរការឡើងវិញទាំងស្រុង នៃការដឹកជញ្ជូនតាមជើងហោះហើរអន្តរជាតិបន្ថែម រវាងគោលដៅទេសចរណ៍របស់ប្រទេសទាំងពីរ និងផ្ដល់ការសម្រួលបន្ថែមដល់ជើងហោះហើរមកពីប្រទេសទីបី និងការដាក់ឲ្យដំណើរការឡើងវិញ នូវសកម្មភាពទេសចរណ៍តាមដងទន្លេ ដើម្បីតភ្ជាប់ខ្សែទេសចរណ៍តាមនាវាសមុទ្រ។

ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងឯកឧត្តម ង្វៀង វ៉ាន់ហុង រដ្ឋមន្រ្តីក្រសួង​វប្បធម៌ កីឡា និងទេសចរណ៍នៃសាធារណរដ្ឋសង្គមនិយមវៀតណាម ​បានជួប​ប្រជុំពិភាក្សាគ្នា អំពី​ការចាប់ផ្តើមដំណើរឡើងវិញទាំងស្រុង នូវសកម្មភាពទេសចរណ៍ រវាងប្រទេសទាំងពីរ នៅទីក្រុងហាណូយ ថ្ងៃទី២៤ ខែឧសភា ឆ្នាំ២០២២ ក្នុងនោះរដ្ឋមន្ត្រីទេសចរណ៍ទាំងពីរ បានផ្តល់​ការ​គាំទ្រ​ទាំងស្រុងចំពោះ​លទ្ឋផល​នៃកិច្ចប្រជុំរវាងឧត្តមមន្ដ្រីទេសចរណ៍​របស់​ភាគីទាំងពីរ កាល​ពី​ថ្ងៃទី១៨ ខែឧសភា ឆ្នាំ២០២២ នៅទីក្រុងហាណូយ ស្តីពីភាពចាំបាច់ក្នុងការអនុវត្ត​ឲ្យកាន់តែខ្លាំង​ថែមទៀត នូវសកម្មភាពកិច្ចសហប្រតិបត្តិការ​ទេសចរណ៍​ ដែលបានព្រមព្រៀងគ្នារួច ហើយនៅក្នុង​ក្របខណ្ឌនៃកិច្ចប្រជុំក្រុមការងារទេសចរណ៍រវាងប្រទេសទាំងពីរ និងបានឯកភាពផ្តោតសំខាន់​លើមុំ​យុទ្ធសាស្ត្រ​មួយចំនួន ​ដើម្បីទ្រទ្រង់ដល់ការជំរុញដាក់ឲ្យដំណើរការឡើងវិញ​ទាំងស្រុង នូវ​សកម្មភាព​ទេសចរណ៍រវាងប្រទេសទាំងពីរនៅក្នុងពេលដ៏ខ្លីខាងមុខនេះ។

ភាគីទាំងពីរជំរុញឲ្យដំណើរការឡើងវិញទាំងស្រុង​នូវការធ្វើដំណើរ​ និងការដឹកជញ្ជូន៖ ភាគី​ទាំង​សង​ខាង​បានបង្ហាញការតាំងចិត្ត ​ក្នុងការជំរុញនិងសម្រួលបន្ថែមដល់ជើងហោះហើរ​ររន្តរជាតិរវាង​គោលដៅ​ទេសចរណ៍របស់ប្រទេសទាំងពីរ ​ក៏ដូចជាផ្ដល់ការសម្រួលបន្ថែមដល់ជើងហោះហើរ​មកពីប្រទេសទីបី ។

លោក ធឿន វុទ្ធី នាយកក្រុមហ៊ុនមរតកអៅដ័រ ថ្លែងថា ទាក់ទងវិស័យទេសចរណ៍ កម្ពុជាមិនទាន់​មានភាព​ល្បីល្បាញ​ដូចប្រទេសវៀតណាម​នៅឡើយ ក្នុងនោះ​សម្រាប់​ការ​លក់​កញ្ចប់​សម្រាប់​ទេសចរណ៍ ពីលោកខាងលិច ឬពីប្រទេសទី៣ ​វៀតណាម​គឺជាប្រទេសមួយ ដែល​ទទួល​ផ្នែកនេះ​បានច្រើន​ ដូច្នេះតាមរយៈនៃកិច្ចព្រម​ព្រៀងជម្រុញ​វិស័យ​ទេសចរណ៍រវាងកម្ពុជា​ និងវៀតណាម លោកថ្លែងនូវការសាទរពេញទំហឹង​ ចំពោះការចាប់ដៃគូរពង្រឹងវិស័យរវាងប្រទេសទាំងពីរ ដោយ​លោក​សង្ឃឹមថា ​កម្ពុជា​នឹងអាចទទួលបានភ្ញៀវទេសកាន់តែច្រើន ជាពិសេសបន្ទាប់ពីកម្ពុជា​កំពុង​ចាកចេញ​ពីជំងឺកូវីដ ១៩ នេះ។

សូមបញ្ជាក់ថា ប្រទេសទាំងពីរ រួមគ្នារៀបចំបង្កើតកញ្ចប់ទេសចរណ៍ ធ្វើការជាមួយគ្នាឲ្យ​កាន់​តែ​ជិតស្និទ្ធ ​ដោយមានការចូលរួមពីវិស័យឯកជន ​ដើម្បីរៀបចំបង្កើត និងផ្តល់ជូននូវកញ្ចប់​ផលិតផល​ទេសចរណ៍រួម ​ក្រោមក្របខណ្ឌនៃការផ្សព្វផ្សាយ “ប្រទេសពីរគោលដៅមួយ” សំដៅខិតខំប្រឹងប្រែង​ទាក់ទាញទេសចរពីប្រទេសទាំងពីរ ក៏ដូចជាទេសចរមកពីប្រទេសទីបី ឲ្យមកទស្សនា​ប្រទេស​ទាំងពីរ៕អត្ថបទ៖ សុន រ៉ាឌី