សហព័ន្ធកីឡាទ្រីយ៉ាត្លុងកម្ពុជា រំពឹងថា ការប្រកួតកីឡាទ្រីយ៉ាត្លុងជ្រើសរើសជើងឯកថ្នាក់ជាតិ ឆ្នាំ២០២៦ នឹងក្លាយជាឱកាសដ៏សំខាន់ក្នុងការស្វែងរកធនធានកីឡាករ-កីឡាការិនីថ្មីៗ ជាពិសេសកីឡាករថ្នាលវ័យក្មេង ដើម្បីបន្តអភិវឌ្ឍ និងត្រៀមឆ្ពោះទៅការធ្វើជាម្ចាស់ផ្ទះព្រឹត្តិការណ៍កីឡាយុវជនអាស៊ី ឆ្នាំ២០៣១។

លោក ងិន សុខបញ្ញា អគ្គលេខាធិការ សហព័ន្ធកីឡាទ្រីយ៉ាត្លុងកម្ពុជា បានឱ្យដឹងថា សហព័ន្ធបានជូនដំណឹងដល់សមាគមកីឡាតាមរាជធានី-ខេត្ត និងក្លិបកីឡាទ្រីយ៉ាត្លុងនានា ស្តីពីការរៀបចំការប្រកួតជើងឯកថ្នាក់ជាតិឆ្នាំ២០២៦ ដែលគ្រោងប្រព្រឹត្តទៅរយៈពេល២ថ្ងៃ គឺនៅថ្ងៃទី១៩-២០ ខែធ្នូ ឆ្នាំ២០២៦ នៅពហុកីឡដ្ឋានជាតិមរតកតេជោ រាជធានីភ្នំពេញ។
អគ្គលេខាធិការរូបនេះបញ្ជាក់ថា ការប្រកួតជើងឯកថ្នាក់ជាតិឆ្នាំនេះ គឺជាវេទិកាប្រកួតប្រជែងដ៏សំខាន់សម្រាប់កីឡាករ-កីឡាការិនី ក្នុងការបង្ហាញសមត្ថភាព និងជាឱកាសរបស់សហព័ន្ធពិនិត្យស្វែងរកធនធានថ្មីៗ ដើម្បីបណ្តុះបណ្តាល និងអភិវឌ្ឍបន្ថែម សម្រាប់ត្រៀមចូលរួមការប្រកួតកម្រិតជាតិ និងអន្តរជាតិនាពេលខាងមុខ។លោកបន្តថាសម្រាប់វិញ្ញាសាប្រកួតឆ្នាំនេះ រួមមាន៖
• វិញ្ញាសាទ្រីយ៉ាត្លុង បុរស-នារី ហែលទឹកចម្ងាយ៧៥០ម៉ែត្រ ជិះកង់២០គីឡូម៉ែត្រ និងរត់៥គីឡូម៉ែត្រ។
• វិញ្ញាសាឌូអាត្លុង បុរស-នារី រត់៥គីឡូម៉ែត្រ ជិះកង់២០គីឡូម៉ែត្រ និងរត់២,៥គីឡូម៉ែត្រ។
• វិញ្ញាសាអាគ័រត្លុង បុរស-នារី ហែលទឹក៥០០ម៉ែត្រ និងរត់២,៥គីឡូម៉ែត្រ។
• វិញ្ញាសាអាគ័រត្លុងកុមារា-កុមារី ហែលទឹក២៥០ម៉ែត្រ និងរត់១,៥គីឡូម៉ែត្រ។
ក្នុងមានសហព័ន្ធ លោក ងិន សុខបញ្ញា អំពាវនាវដល់កីឡាករ-កីឡាការិនីដែលមានបទពិសោធន៍ អ្នកចាប់ផ្តើមថ្មី ទាំងកុមារា-កុមារីដែលមានចំណាប់អារម្មណ៍លើកីឡាទ្រីយ៉ាត្លុង សូមចូលរួមប្រកួតឱ្យបានច្រើនកុះករ ដើម្បីបង្ហាញសមត្ថភាព និងបើកឱកាសឱ្យសហព័ន្ធស្វែងរកធនធានកីឡាករថ្មីៗបន្ថែម សម្រាប់ការអភិវឌ្ឍវិស័យកីឡាទ្រីយ៉ាត្លុងកម្ពុជាឱ្យកាន់តែរីកចម្រើន។
ការប្រកួតនេះមិនត្រឹមតែជាវេទិកាវាស់ស្ទង់សមត្ថភាពកីឡាករ-កីឡាការិនីប៉ុណ្ណោះទេ ប៉ុន្តែក៏ជាផ្នែកមួយនៃការកសាងធនធានកីឡាថ្នាល ដើម្បីត្រៀមខ្លួនសម្រាប់ការប្រកួតអន្តរជាតិ និងគោលដៅកីឡាយុវជនអាស៊ី ឆ្នាំ២០៣១ ដែលកម្ពុជានឹងធ្វើជាម្ចាស់ផ្ទះផងដែរ៕





