​អឺរ៉ុប៖ ប្រធាន​គណៈកម្មការ​អឺរ៉ុប​លោកស្រី Ursula von der Leyen កាលពី​ថ្ងៃ​អង្គារ​បាន​ចោទប្រកាន់រុស្ស៊ី​ថា ​បាន​បាញ់​ផ្លោង​ដោយ​ចេតនា​លើ​ឃ្លាំង​គ្រាប់​ធញ្ញជាតិ​នៅ​ទូទាំងប្រទេស​អ៊ុយ​ក្រែ​ន ​ដោយ​យកការផ្គត់ផ្គង់​ស្បៀងអាហា​រ​ធ្វើជា​អាវុធ​។​

​ថ្លែង​ទៅកាន់​វេទិកា​សេដ្ឋកិច្ចពិភពលោក​នៅ​ទីក្រុង Davos ប្រទេស​ស្វី​ស លោកស្រី Von der Leyen បាន​និយាយថា ​ស្រូវ​សាលី​ប្រមាណ 20លាន​តោន​នៅតែ​ជាប់គាំង​នៅក្នុងប្រទេស​អ៊ុយ​ក្រែ​ន ខណៈ កំពង់ផែ​សមុទ្រ​ខ្មៅ​ត្រូវបាន​បិទ​ក្នុងអំឡុងពេល​ជម្លោះ​។​ ​លោកស្រី​និយាយថា វា​មានន័យថា​ បណ្តា​ប្រទេស​ដែល​ងាយ​រង​ផលប៉ះពាល់ និង​ប្រជាជន​ដែល​ងាយរងគ្រោះ​នឹងរង​ទុក្ខលំបាក​ខ្លាំង​បំផុត​។ មុនពេល​សង្គ្រាម ​អ៊ុយ​ក្រែ​ន​គឺជា​ប្រទេស​នាំចេញគ្រាប់​ធញ្ញជាតិ​ធំ​បំផុត​មួយ​នៅលើ​ពិភពលោក​។​

​ទន្ទឹមគ្នា​នេះដែរ រដ្ឋមន្ត្រីក្រសួង​ដឹកជញ្ជូន​លោក Grant Shapps បាន​និយាយថា ចក្រភព​អង់គ្លេសកំពុង​ពិភាក្សា​ជាមួយ​អ៊ុយ​ក្រែ​ន ​អំពី​របៀប​ជួយ​នាំយក​គ្រាប់​ធញ្ញជាតិ​ចេញពី​ប្រទេស បន្ទាប់ពី​រុស្ស៊ី​បានបិទ​ច្រក​កំពង់ផែ​សមុទ្រ​។ លោក Shapps និយាយថា ​លោក​មានការ​ព្រួយបារម្ភ​ខ្លាំង​អំពី​បញ្ហា​នេះ ដែល​បាន​មើលឃើញថា​ តម្លៃ​ស្បៀងអាហារ​ពិភព​លោក​កើនឡើង ខណៈ​អ៊ុយ​ក្រែ​ន​មិនអាច​នាំចេញគ្រាប់​ធញ្ញជាតិ​ជិត 25លាន​តោន​៕

អត្ថបទ៖ ប៊ុនថន