​បាល់ទាត់៖ ​ខ្សែប្រយុទ្ធ​ក្រុម​បិសាច​ក្រហម Manchester United, Marcus Rashford​ ត្រូវ​បាន​គេ​វាយតម្លៃ​ជា​កីឡាករ​ ដែល​មាន​តម្លៃ​ថ្លៃ​បំផុត​លើ​លោក នេះ​បើ​តាម​ការវាយតម្លៃ​របស់​មជ្ឈមណ្ឌល​អន្តរជាតិ ​ស្រាវជ្រាវ​អំពី​កីឡា​ហៅ​កាត់​ថា CIES​។

​​CIES បាន​បញ្ចេញ​លទ្ធផល​នៃ​ការវាយតម្លៃ​នេះ ​តាមរយៈ​ការ​គណនា​ពី​ទិន្នន័យ​រួមមានស្ថិតិ​ក្នុង​ការ​ប្រកួត ថ្លៃ​ពលកម្ម តម្លៃ​ដែល​ក្លិប​ផ្សេង​ហ៊ាន​ឲ្យ​ថ្លៃ និង​ទំហំ​នៃ​កិច្ចសន្យាដែល​ធ្វើឲ្យ CIES រក​ឃើញ​ថា Marcus Rashford ជា​កីឡាករ​ដែល​មាន​តម្លៃ​ថ្លៃ​ជាងគេ​ដល់​ទៅ ១៦៥.៦ លាន​ផោន​។ ​ទាំង​នេះ​មិនបាន​បូក​បញ្ចូល​ការងារ​មនុស្សធម៌​រប​ស់ Rashford​ ឡើយ ខណៈ​កីឡាករ​អង់គ្លេស​រូប​នេះ​ ដើរតួ​យ៉ាង​សំខាន់​ក្នុង​ការ​ស្វែងរក​មូល​និ​ធី​ជួយ​កុមារ​។ ​កីឡាករ​របស់ Manchester United ម្នាក់ទៀត​គឺ Bruno Fernandes​ ឈរ​លេខ​៥ ក្នុង​តារាង​ដោយមាន​តម្លៃ ១៥១.១​លាន​ផោន​។​

​​ចំណែក​លេខ​២ គឺ​ខ្សែប្រយុទ្ធ Dortmund, Erling Haaland ​ដែល​មាន​តម្លៃ ១៥២​លាន​ផោន, លេខ​៣ ខ្សែ​ការពារ Liverpool, Trent Alexander-Arnold មានតម្លៃ ១៥១.៦​លាន​ផោន​។ ​Kylian Mbappe ​និង Jadon Sancho ឈរ​លេខ៦ និង​លេខ៧ ក្នុង​តារាង​តាម​ពីក្រោយ​ដោយ Joao Felix​។​ ​Lionel Messi មិន​ស្ថិត​ក្នុង​បញ្ជី Top20 ឡើយ ​ខណៈ​កីឡាករ​អា​ហ្ស​ង់​ទីន​រូប​នេះ​ជិត​ផុត​កិច្ចសន្យា​នៅ Barcelona ទៅ​ហើយ​៕

​អត្ថបទ​៖​នាង សុភា​វុ​ធ