ភ្នំពេញ៖ ក្នុងរយៈពេល ៦ថ្ងៃ នៃយុទ្ធការធ្វើយុទ្ធនាការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ ឆ្នាំ២០២២ គឺចាប់ពីថ្ងៃទី២១ ដល់ថ្ងៃទី២៦ ខែឧសភា ឆ្នាំ២០២២ គណៈកម្មាធិការជាតិរៀបចំការបោះឆ្នោត (គជប) បានទទួលបណ្ដឹងបានចំនួន៣៣បណ្ដឹង តែបណ្ដឹងទាំងនោះមិនទាន់ធ្វើឲ្យរាំងស្ទះ និងជះឥទ្ធិពលដល់ការបោះឆ្នោត ។

 បើយោងតាមសេចក្តីប្រកាសព័ត៌មានរបស់ គ.ជ.ប ស្តីពី សភាពការណ៍ទូទៅជុំវិញដំណើរកា នៃការឃោសនាបោះឆ្នោត នៅថ្ងៃទី២៧ ខែឧសភា ឆ្នាំ២០២២ ឯកឧត្តម ហង ពុទ្ធា អ្នកនាំពាក្យ គ.ជ.ប បានវាយតម្លៃថា ដំណើរការឃោសនាបោះឆ្នោតជ្រើសរើសក្រុមប្រឹក្សាឃុំ សង្កាត់ រយៈ៦ថ្ងៃ បានប្រព្រឹត្តិទៅដោយរលូន មានការយោគយល់អាធ្យាស្រ័យគ្នាខ្ពស់ មានកិច្ចសហការពីភាគីពាក់ព័ន្ធនានា បានល្អប្រសើរ ដែលរក្សាបាននូវសន្តិសុខ សុវត្ថិភាព និងសណ្ដាប់ធ្នាប់របៀបរៀបរយក្នុងឃុំសង្កាត់ ។

 ឯកឧត្តមបានបន្តថា ជាទូទៅគណបក្សនយោបាយចំនួន ១៧ បានជូនដំណឹងអំពីការធ្វើសកម្មភាពឃោសនារបស់គណបក្សខ្លួននៅតាមឃុំសង្កាត់ ដែលគណបក្សទាំងនោះបានចុះបញ្ជីបេក្ខជនឈរឈ្មោះបោះឆ្នោត ហើយគណបក្សទាំងអស់ ក៏មានឱកាសស្មើគ្នា នៅលើប្រព័ន្ធផ្សព្វ ផ្សាយព័ត៌មានរបស់រដ្ឋ តាមរយៈកម្មវិធីស្មើភាព ដែលរៀបចំដោយ គ.ជ.ប ដើម្បីឲ្យគណបក្សនយោបាយផ្សព្វផ្សាយអំពីគោលនយោបាយ និងកម្មវិធីនយោបាយរបស់ខ្លួន ក្នុងការអភិវឌ្ឍឃុំសង្កាត់ ។

 អ្នកនាំពាក្យ គ.ជ.ប រូបនេះ បានបន្ថែមថា គិតត្រឹមថ្ងៃទី២៦ ខែឧសភា មានពាក្យបណ្ដឹងចំនួន៣៣ហើយ ត្រូវបានគណៈកម្មការឃុំ សង្កាត់ រៀបចំការបោះឆ្នោតបានដោះស្រាយ និងកំពុងធ្វើការដោះស្រាយពាក្យបណ្ដឹងទាំងនោះទៅតាមនីតិវិធី ដោយពាក្យបណ្ដឹងភាគច្រើន គឺជាពាក្យបណ្ដឹងរបស់តំណាងគណបក្សប្រជាជនកម្ពុជា ប្តឹងតំណាងគណបក្សភ្លើងទៀន ថាបានប្រើពាក្យប្រមាថ មាក់ងាយទៅលើបេក្ខជនគណបក្សប្រជាជនកម្ពុជា ក្នុងសកម្មភាពឃោសនាបោះឆ្នោតរបស់ខ្លួន ដែលផ្ទុយពីគោលការណ៍ទូទៅសម្រាប់ការឃោសនាបោះឆ្នោត ដែលកំណត់ក្នុងច្បាប់ និងបទបញ្ជា និងនីតិវិធីសម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់ ។

 ឯកឧត្តម ហង់ ពុទ្ធា បានបញ្ជាក់ថា រាល់ដំណើរការរៀបចំការបោះឆ្នោត គ.ជ.ប តែងតែទទួលបានពាក្យបណ្ដឹង ហើយទោះបីពាក្យបណ្ដឹងមានតិច ឬច្រើន ក៏បណ្ដឹងនោះវាមិនធ្វើឲ្យរាំងស្ទះ និងជះឥទ្ធិពលដល់ការបោះឆ្នោត ៕ អត្ថបទ ៖ បាន សុខរិទ្ធិ