មីយ៉ាន់ម៉ា៖ របបយោធាសហភាពមីយ៉ាន់ម៉ា បានចោទប្រកាន់ក្រុមបាតុករពីបទដុតបំផ្លាញ និងអំពើហិង្សា ស្របពេលដែលបណ្ដាប្រទេសលោកខាងលិច ដាក់ទណ្ឌកម្មបន្ថែមទៀតមកលើបុគ្គល និងក្រុមមនុស្សដែលពាក់ព័ន្ធ នឹងការធ្វើរដ្ឋប្រហារកាលពីខែមុន និងការចាត់វិធានការបង្ក្រាបយ៉ាងឃោរឃៅលើក្រុមប្រឆាំង។
គួរឲ្យដឹងថា កាលពីថ្ងៃចន្ទកន្លងទៅ រដ្ឋមន្ត្រីការបរទេសសហរដ្ឋអាមេរិក លោក អាន់ថូនី ប្ល៊ីនគិន បានប្រកាសទណ្ឌកម្មថ្មីលើសមាជិកយោធាមីយ៉ាន់ម៉ា សម្រាប់វិធានការបង្ក្រាបរបស់ពួកគេទៅលើបាតុកម្មគាំទ្រលទ្ធិប្រជាធិបតេយ្យ ចាប់តាំងពីយោធាបានរឹបអូសអំណាចពីរដ្ឋាភិបាលស៊ីវិលរបស់លោកស្រី អ៊ុងសាន ស៊ូជី កាលពីថ្ងៃទី១ ខែកុម្ភៈ ឆ្នាំ២០២១ កន្លងទៅ។ លោក ច. មីនទុន អ្នកនាំពាក្យរបបយោធាបាននិយាយថា មនុស្ស ១៦៤នាក់ត្រូវបានបាញ់សម្លាប់ក្នុងអំពើហិង្សានេះ និងបានសម្ដែងនូវភាពក្រៀមក្រំជាខ្លាំង ចំពោះការស្លាប់ ប៉ុន្តែក្រុមសកម្មជនអះអាងថា មនុស្ស ២៦១នាក់បានត្រូវបានបាញ់សម្លាប់ ដោយកងកម្លាំងសន្តិសុខ។ មនុស្ស ៣នាក់បានស្លាប់នៅទីក្រុងធំទី២ ម៉ាន់ដាឡេ អំឡុងភាពរំជើបរំជួលកាលពីថ្ងៃចន្ទ ក្នុងនោះរួមមានទាំងក្មេងប្រុសម្នាក់ផងដែរ។
សារព័ត៌មាន Mizzima រាយការណ៍ថា កងកម្លាំងសន្តិសុខសហភាពមីយ៉ាន់ម៉ា បានបើកការវាយឆ្មក់បន្ថែមទៀតនៅតាមតំបន់ជាច្រើន ក្នុងទីក្រុងយ៉ាងហ្គោនកាលពីយប់ថ្ងៃចន្ទ ជាមួយនឹងការបាញ់ប្រហារបណ្ដាលឲ្យមនុស្ស ជាច្រើននាក់រងរបួស។ ខណៈពេលនោះដែរ របបយោធាបានព្យាយាមកែតម្រូវ ការធ្វើរដ្ឋប្រហារកាលពីខែមុនដោយអះអាងថា ការបោះឆ្នោតកាលពីថ្ងៃទី៨ ខែវិច្ឆិកា ឆ្នាំ២០២០ ដែលបានឈ្នះភ្លូកទឹកភ្លូកដី ដោយគណបក្សសម្ព័ន្ធជាតិដើម្បីលទ្ធិប្រជាធិបតេយ្យរបស់លោកស្រី ស៊ូជី នោះមានការលួចបន្លំសន្លឹកឆ្នោត គឺជាការចោទប្រកាន់មួយត្រូវបានគណៈកម្មាធិការជាតិ រៀបចំការបោះឆ្នោតធ្វើការច្រានចោលទាំងស្រុង។ ក្រុមមេដឹកនាំយោធាសន្យារៀបចំការបោះឆ្នោតថ្មី ប៉ុន្តែពួកគេមិនបានកំណត់កាលបរិច្ឆេទច្បាស់ណាស់ណាមួយនោះទេ មិនតែប៉ុណ្ណោះពួកគេបានប្រកាសដាក់រដ្ឋ ក្នុងគ្រាអាសន្នថែមទៀតផង៕
អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
