ភ្នំពេញ៖ ឯកអគ្គរដ្ឋទូតស្វីស ប្រចាំនៅកម្ពុជា លោកស្រី ហេលែន ប៊ុដលីហ្គ័រ អាធីដា បានថ្លែងអះអាងថា ដំណើការលទ្ធិប្រជាធិបតេយ្យនៅប្រទេសកម្ពុជាបានមានលក្ខណៈល្អប្រសើ ខណៈការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ ដែលនឹងប្រព្រឹត្តិទៅនាថ្ងៃទី៥ ខែមិថុនា ឆ្នាំ២០២២ខាងមុខនេះ គឺមានគណបក្សនយោបាយច្រើនចូលរួមប្រកួតប្រជែង ហើយមួយវិញទៀត អ្នកស្រីមើលឃើញប្រទេសកម្ពុជាមានសុខសន្តិភាព បានធ្វើឲ្យប្រទេសកម្ពុជាមានការអភិវឌ្ឍច្រើនគួរឲ្យកត់សម្គាល់ផងដែរនោះ។
ក្នុងកិច្ចសម្ភាសន៍ខ្លីជាមួយទូរទស្សន៍BTV ក្នុងឱកាសចូលរួមកម្មវិធីទីភ្នាក់ងារស្វីសដើម្បីកិច្ចអភិវឌ្ឍន៍ និងសហប្រតិបត្តិការប្រារព្ឋខួប១០ឆ្នាំ នៅក្នុងប្រទេសកម្ពុជា និងពិធីផ្សព្វផ្សាយកម្មវិធីសហប្រតិបត្តិការថ្មី នាល្ងាចថ្ងៃទី២៧ ខែឧសភា ឆ្នាំ២០២២នេះ លោកស្រី ហេលែន ប៊ុដលីហ្គ័រ អាធីដា បានលើកឡើង ថា រដ្ឋាភិបាលស្វីសលើកទឹកចិត្តឲ្យមានការចូលរួមជាច្រើនពីបណ្តាគណបក្សនយោបាយ ឬបណ្តាអង្គការ សង្គមស៊ីវិលនានា ក្នុងពេលដែលកម្ពុជាធ្វើយុទ្ធនាការបោះឆ្នោត។ ប៉ុន្តែតាមការមើលឃើញការបោះឆ្នោត ពេលខាងមុខនេះគឺមានគណបក្សនយោបាយច្រើនដែលពួកគេចូលរួមប្រកួតប្រជែង។
ជាមួយគ្នានោះដែរ លោកស្រី ហេលែន ប៊ុដលីហ្គ័រ អាធីដា ក៏បានមើលឃើញអំពីភាពរីកចំរើននៅប្រទេសកម្ពុជាផងដែរ ដោយការរីកចំរើននៅប្រទេសកម្ពុជានេះគឺកើតចេញពីសន្តិភាព ហើយលោកស្រីមានសុទិដ្ឋិនិយមថា ការរីកចំរើននេះនឹងបន្តកើតឡើងជាបន្តបន្ទាប់ទៀតនៅប្រទេសកម្ពុជា។
អ្នកស្រីក៏បានលើកឡើងផងដែរថា កិច្ចប្រតិបត្តិការទ្វេភាគីរវាងកម្ពុជា និងស្វីសបានប្រព្រឹត្តិទៅយ៉ាងល្អប្រសើរ ដោយទុកចិត្តគ្នាបានយូរអង្វែង ហើយស្វីសក៏បានជួយដល់ប្រទេសកម្ពុជាលើផ្នែកមួយចំនួនផងដែរ ដែលភាគច្រើនគឺផ្តោតសំខាន់លើការកាត់បន្ថយភាពក្រីក្រ ការគាំទ្រកិច្ចអភិវឌ្ឍន៍ប្រកបដោយចីរភាពនិងសមធម៌ និងការលើកកម្ពស់អភិបាលកិច្ចតាមបែបប្រជាធិបតេយ្យ និងប្រកបដោយការចូលរួមព្រមទាំងពង្រឹងភាពធន់របស់ប្រជាជនទៅ និងវិបត្តិ នៃការរីករាលដាលជំងឺកូវីដ១៩និងផលប៉ះពាល់ដែលកំពុងកើនឡើងពីការប្រែប្រួលអាកាសធាតុ និងគ្រោះមហន្តរាយ ហើយនិងវិស័យសុខភាពរបស់កុមារផងដែរ៕ អត្ថបទ៖ បាន ចក់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
