អ៊ុយក្រែន៖ ប្រធានាធិបតីអ៊ុយក្រែនលោក Volodymyr Zelenskyy កាលពីថ្ងៃសុក្របានបញ្ជាក់ជាថ្មីម្តងទៀតថា ស្ថានភាពនៅភាគខាងកើតរបស់ប្រទេសលោកមានភាពលំបាកខ្លាំង ខណៈកងកម្លាំងរុស្ស៊ីបានបន្តផ្តោតការខិតខំខ្លាំងទៅលើតំបន់ Donbas។
ក្នុងសុន្ទរកថាលោក Zelenskyy និយាយថា កងកម្លាំងរុស្ស៊ីបានដាក់ពង្រាយកាំភ្លើងធំ និងការត្រៀមបម្រុងជាច្រើនទៀតនៅក្នុងតំបន់នោះ ហើយកំពុងប្រើប្រាស់ការវាយប្រហារតាមអាកាស និងការវាយប្រហារដោយមីស៊ីល។ លោក Zelenskyy និយាយថា កងកម្លាំងអ៊ុយក្រែនកំពុងធ្វើអ្វីគ្រប់យ៉ាង ជាមួយនឹងធនធានការពារដែលមាននាពេលបច្ចុប្បន្នដើម្បីការពារទឹកដី។ យើងកំពុងធ្វើអ្វីគ្រប់យ៉ាងដើម្បីធ្វើឲ្យរឹងមាំឡើងវិញ។ លោកនិយាយថា ទីក្រុងសំខាន់ៗចំនួនពីរនៅក្នុងតំបន់ Luhansk គឺក្រុង Lyman និង Sievierodonetsk នឹងមិនធ្លាក់ទៅក្នុងដៃរបស់រុស្ស៊ីនោះទេ ខណៈមានរបាយការណ៍អំពីកងកម្លាំងរុស្ស៊ីដណ្តើមបានទីក្រុង Lyman និងហ៊ុមព័ទ្ធទីក្រុង Sievierodonetsk។
លោក Zelenskyy បានសន្យាថា ទោះបីជាប្រទេសរុស្ស៊ីនាំមកនូវការបំផ្លាញ និងការធ្វើឲ្យរងទុក្ខវេទនានៅទីនោះក៏ដោយ យើងនឹងកសាងឡើងវិញទីក្រុង និងគ្រប់សហគមន៍ទាំងអស់។ ដោយមានសំឡេងស៊ីរ៉ែននៃការវាយប្រហារតាមអាកាស និងការបាញ់ផ្លោងដោយកាំភ្លើងធំ ជនស៊ីវិលកំពុងភៀសខ្លួនចេញពីទីក្រុង និងតំបន់នានានៅភាគខាងកើតប្រទេសអ៊ុយក្រែន ខណៈកម្លាំងរុស្ស៊ីឈានរុលទៅមុខបន្តិចៗចូលក្នុងតំបន់៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
