បន្ទាយមានជ័យ៖ ក្នុងពិធីសំណេះសំណាលជាមួយប្រជាពលរដ្ឋ លោក សឹង្ហ ទុំ ប្រធានក្រុមការងារគណបក្សប្រជាជនកម្ពុជា ចុះជួយឃុំឈ្នួរមានជ័យ បានណែនាំដល់បេក្ខភាពក្រុមប្រឹក្សាឃុំទាំងអស់ ត្រូវខិតខំបម្រើប្រជាពលរដ្ឋក្នុងមូលដ្ឋានឲ្យបានល្អ។

នៅថ្ងៃទី២៨ ខែឧសភា ឆ្នាំ២០២២ លោក សឹង្ហ ទុំ សមាជិកគណៈបក្សខេត្ត ចុះជួយ​ស្រុក​ព្រះនេត្រព្រះ និងជាប្រធានក្រុមការងារចុះជួយឃុំឈ្នួរមានជ័យ បានចុះសំណេះសំណាល​សួរសុខ​ទុក្ខបងប្អូនប្រជាពលរដ្ឋក្នុង ភូមិរពាក់ ​ឃុំឈ្នួរមានជ័យ និងបង្រៀនពីការគូរសន្លឹកឆ្នោត​ឱ្យ​បានត្រឹមត្រូវ នឹងអប់រំផ្សព្វផ្សាយអំពីគោលនយោបាយរបស់គណបក្សប្រជាជនកម្ពុជា ស្ថិតក្នុងស្រុកព្រះនេត្រព្រះ។

លោក សឹង្ហ ទុំ បានស្នើបេក្ខជនក្រុមប្រឹក្សាភូមិឃុំទាំងអស់ ខិតខំបម្រើប្រជាពលរដ្ឋឲ្យបានកាន់​តែ​សកម្ម និងល្អប្រសើរថែមទៀត សម្រាប់ភាពសុខសាន្ត និងភាពរីកចម្រើនក្នុងមូលដ្ឋានរបស់ខ្លួន និងបានស្នើឲ្យមានការចូលរួមបោះឆ្នោតជ្រើសរើសក្រុមប្រឹក្សា ឃុំ-សង្កាត់ អាណត្តិទី៥ ដែលនឹង​ប្រព្រឹត្តទៅនាថ្ងៃទី០៥ ខែមិថុនា ឆ្នាំ២០២២ ខាងមុខនេះ គឺបោះឆ្នោតជូនគណបក្សប្រជាជនកម្ពុជា ដើម្បីបន្តអភិវឌ្ឍន៍​ប្រទេសជាតិឲ្យកាន់តែមានការរីកចម្រើន និងសម្បូររុងរឿងថែមទៀត។

លោក សឹង្ហ ទុំ បានថ្លែងអំណរគុណចំពោះប្រជាពលរដ្ឋដែលតែងបានផ្តល់ការគាំទ្រយ៉ាងលើសលប់ និងបានបោះឆ្នោតជូនគណបក្សប្រជាជនក្នុងគ្រប់អាណត្តិកន្លងមក ពីព្រោះមានតែ​ប្រជាពលរដ្ឋ​ផ្ទាល់ ជាអ្នកបានឆ្លងកាត់ផ្ទាល់ និងស្គាល់ច្បាស់​អំពីការអភិវឌ្ឍរីកចម្រើនជាក់ស្តែង​នៅក្នុងមូលដ្ឋាន​របស់ខ្លួន និងសូមបន្តគាំទ្រសំដៅធ្វើយ៉ាងណារក្សាប្រៀបឈ្នះ និងទទួលបានជោគជ័យ​ឱ្យបាន​លើស​លប់​បន្តទៀត៕