កំពត៖ ដើម្បីសម្រួលដល់ការលក់ដូររបស់អាជីវករ នៅក្នុងផ្សារតានី កុំឱ្យក្តៅថប់ខ្យល់ និងមានក្លិនមិនល្អ ឯកឧត្តម ម៉ៅ ធនិន អភិបាលខេត្តកំពត បានអះអាងថា នឹងជួយរៀបចំធ្វើដំបូលផ្សារតានី ស្រុកអង្គរជ័យ ឲ្យខ្ពស់ជាងមុន និងមានបំពាក់កង្ហារបឺតក្លិនផងដែរ។

នាថ្ងៃទី២៧ ឧសភា ម្សិលមិញនេះ ឯកឧត្តម ម៉ៅ ធនិន អភិបាលខេត្តកំពត បានដឹកនាំមន្ត្រីជំនាញ​និងពាក់ព័ន្ធ អាជ្ញាធរ ចុះសំណេះសំណាល សួរសុខទុក្ខ អាជីវករដែល​កំពុងលក់ដូរ​នៅក្នុងផ្សារតានី ស្រុកអង្គរជ័យ។

នៅក្នុងឱកាសនោះដែរ ឯកឧត្តម បានជជែកសួរនាំ អំពីស្ថានភាពទូទៅ ​ទាំងជីវភាពរស់នៅរបស់​អាជីវករ ​ការងារលក់ដូរ ​ការងារសន្តិសុខផ្សារ ​ការថែរក្សាបរិស្ថាន និង​អនាម័យ​នៅ​ក្នុង​ផ្សារតានីផងដែរ។

បន្ទាប់ពីបានជជែកសួរនាំ ជាមួយអាជីវករួមមក ឯកឧត្តម ទទួលយកសំណូមពរជាច្រើនពីអាជីវករ ហើយក្នុងនោះ​ បញ្ហាអាទីភាពត្រូវដោះស្រាយឲ្យបានឆាប់រហ័ស គឺការគ្រោងរៀបចំដំបូលផ្សារឲ្យ​បាន​ខ្ពស់ជាងមុន ​ដើម្បីកុំឲ្យអាជីវករក្តៅ ថប់ខ្យល់ ​បន្ថែមពីនោះទៅទៀត ដំបូលផ្សារត្រូវ​បំពាក់​កង្ហារបឺតក្លិនផងដែរ ។

ឯកឧត្តម ម៉ៅ ធនិន បានមានប្រសាសន៍ថា ទន្ទឹមនឹងបងប្អូនអាជីវករមានជីវភាពកាន់​តែ​ប្រសើរហើយនោះ ​ បញ្ហាសុខភាព​ និងអនាម័យនៅក្នុងផ្សារជាកត្តាសំខាន់បំផុត ដើម្បីទាក់ទាញ​អតិថិជន ​ភ្ញៀវទេសចរឲ្យមកទិញផលិតផល​ សម្ភារៈគ្រឿងប្រើប្រាស់កាន់តែច្រើនជាងមុន ។

ឯកឧត្តម អភិបាលខេត្តបានប្រាប់ឲ្យលោក ចាន់ ថា អភិបាលរងខេត្ត ជាមុខការ ​ក្នុងការសិក្សា​ឡើងប្លង់ដំបូល​ផ្សារឲ្យខ្ពស់ជាងមុន​ និងមានបំពាក់កង្ហារបឺតក្លិនផងដែរ ហើយនៅពេលឡើង​ប្លង់​ដំបូលផ្សាររួច ​ត្រូវឡើងប្លង់ចំណាយឲ្យបានមុនបំណាច់ខែនេះ ​ដើម្បីយកទៅពិគ្រោះជាមួយអាជីវករ ហើយឯកឧត្តម អភិបាលខេត្ត ​លោកនឹងចូលរួមជាថវិកា​ជាបងប្អូនអាជីវករផងដែរ៕

អត្ថបទ៖ អន សារឹម