​ប្រណាំង​កង់៖ កីឡាករ​ Jai Hindley បាន​ក្លាយជា​កីឡាករ​ប្រណាំង​កង់​អូស្ត្រាលី​ទី១ ដែល​ឈ្នះ​ជើងឯក​ប្រណាំង​កង់ Grand Tour, Giro d’ Italia បន្ទាប់ពី​ការប្រកួត​ដំណាក់កាល​ចុងក្រោយ​បញ្ចប់​នៅ​ថ្ងៃអាទិត្យ​ម្សិលមិញ​។​

​​មុន​ចាប់ផ្តើម​ដំណាក់កាល​ចុងក្រោយ​នៅ​ថ្ងៃអាទិត្យ​នោះ កាលពី​ថ្ងៃ​សៅរ៍​ដែលជា​ដំណាក់កាល​ទី២០ កីឡាករ​របស់​ក្រុម Bora-Hansgrohe, Jai Hindley បាន​ឡើងមក​កាន់កាប់​អាវកាក់​ពណ៌​ផ្កាឈូក​ទៅ​ហើយដោយ​នាំមុខ ៨៥វិនាទី​ពីលើ​កីឡាករ​ងេ​ក្វា​ដ័​រ Richard Carapaz​។ ​​ឈាន​មកដល់​ដំណាក់កាល​ចុងក្រោយ​ ដែលជា​ការប្រណាំង​យក​ថេរវេលា​ផ្ទាល់ខ្លួនមាន​ចំងាយ​ផ្លូវ​ត្រឹម ១៧.៤គីឡូម៉ែត្រ​នៅ​ទីក្រុង Verona នោះកីឡាករ​ម្ចាស់ផ្ទះ​អ៊ីតាលី Matteo Sobrero គឺជា​អ្នកឈ្នះ​ដោយ​ប្រើ​ថេរវេលា ២២នាទី ២៤វិនាទី តែ​មិនបាន​ប៉ះពាល់​ដល់​វេលា​នាំមុខ​រួម​របស់ Jai Hindley ឡើយ​។

​​កីឡាករ​អូស្ត្រាលី​រូបនេះ​បានបញ្ចប់ ២១ដំណាក់កាល​ជាមួយនឹង​វេលា​ចំណេញ ១នាទី ១៨វិនាទី​ពីលើ​គូប្រជែង Richard Carapaz ខណៈ​លេខ៣ គឺ​កីឡាករ​អេ​ស្ប៉ា​ញ Mikel Landa ទទួលបាន​ចំណាត់ថ្នាក់​លេខ៣​។ ​​ចំណែកឯ​អតីត​ជើងឯក Giro d’Italia នេះ​ពីរ​សម័យ​កីឡាករ​ម្ចាស់ផ្ទះ​អ៊ីតាលី Vincenzo Nibali បានបញ្ចប់​នៅ​ចំណាត់ថ្នាក់​លេខ៤ ក្នុងការ​ចូលរួម​ព្រឹត្តិការណ៍​នេះ​ជា​ចុងក្រោយ​នៃ​អាជីព​ក្នុង​វ័យ ៣៧ឆ្នាំ​៕

​អត្ថបទ​៖​នាង សុភា​វុ​ធ