រុស្ស៊ី៖ មន្ត្រីការពារជាតិរុស្ស៊ីបាននិយាយកាលពីថ្ងៃអាទិត្យថា កងកម្លាំងរបស់ទីក្រុងមូស្គូបានបំផ្លាញឃ្លាំងគ្រាប់រំសេវសំខាន់របស់អ៊ុយក្រែននៅក្នុងទីក្រុង Kryvyi Rih ភាគខាងកើត។
និយាយនៅក្នុងសន្និសីទសារព័ត៌មានអ្នកនាំពាក្យក្រសួងការពារជាតិលោក Igor Konashenkov បាននិយាយថា មីស៊ីលរបស់រុស្ស៊ីបានវាយប្រហារលើឃ្លាំងផ្ទុកទំនិញ មានទីតាំងនៅក្នុងសហគ្រាសឧស្សាហកម្មមួយកន្លែងក្នុងទីក្រុងនៅតំបន់ Dnipropetrovsk ភាគខាងកើតប្រទេសអ៊ុយក្រែន។ អង្គភាពសេវាកម្មសង្គ្រោះបន្ទាន់របស់អ៊ុយក្រែនបានបញ្ជាក់កាលពីថ្ងៃអាទិត្យថា រោងចក្រឧស្សាហកម្មមួយកន្លែងនៅក្រុង Kryvyi Rih បានឆេះ បន្ទាប់ពីត្រូវបានវាយប្រហារដោយគ្រាប់រ៉ុក្កែតរុស្ស៊ីចំនួនពីរគ្រាប់។
អ្នកនាំពាក្យអង្គភាពសេវាសង្គ្រោះបន្ទាន់របស់រដ្ឋបាននិយាយនៅក្នុងសន្និសីទថា គ្មានអ្នកស្លាប់ និងរងរបួសនោះទេ ប៉ុន្តែមិនបានបញ្ជាក់ថា តើរោងចក្រនេះជាគោលដៅរបស់យោធា ឬយ៉ាងណា។ ក្រសួងការពារជាតិរុស្ស៊ីបានចេញផ្សាយវីដេអូកាលពីថ្ងៃអាទិត្យ នូវអ្វីដែលពួកគេបាននិយាយថា ជាការងារប្រយុទ្ធរបស់អង្គភាពកាំភ្លើងធំធុនធ្ងន់ Malka៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
