កោះកុង៖ ប្រជាពលរដ្ឋរស់នៅក្នុងឃុំជ្រោយប្រស់ ស្រុកកោះកុង ខេត្តកោះកុង បានបង្ហាញការគាំទ្រ និងពេញចិត្តយ៉ាងខ្លាំងចំពោះសកម្មភាពដឹកនាំអភិវឌ្ឍន៍ហេដ្ឋារចនាសម្ព័ន្ធមូលដ្ឋាននានា បម្រើដល់ប្រយោជន៍សាធារណៈក្នុងអាណតិ្តទី៤។

ផ្លូវកៅស៊ូ ផ្លូវក្រាលគ្រួសក្រហម ផ្លូវបេតុង អាងទឹកស្អាត ការផ្តល់សេវាសាធារណៈ ទំនប់ទប់ទឹកប្រៃ សាលារៀន និងមណ្ឌលសុខភាព បានផុសលេចរាងឡើងនៅក្នុងឃុំជ្រោយប្រស់ តាមសេចក្តីត្រូវការចង់បាន របស់ប្រជាពលរដ្ឋ ក្នុងអាណត្តិទី៤។

សមិទ្ធផលទាំងនេះ បានធ្វើឱ្យប្រជាពលរដ្ឋ មានការពេញ ចិត្តជាខ្លាំងចំពោះការដឹកនាំ​របស់​គណបក្ស​ប្រជាជនកម្ពុជា។

ប្រជាពលរដ្ឋ ក៏ជឿជាក់ថា នៅអាណត្តិទី៥នេះ ​មូលដ្ឋានរស់នៅរបស់ពួកគេ នឹងកាន់តែមាន​ការ​អភិវឌ្ឍ​នូវវិស័យសំខាន់ជាច្រើនទៀត តាមរយៈការទៅបោះឆ្នោតជ្រើសរើសក្រុមប្រឹក្សាឃុំសង្កាត់ ដែលមានសមត្ថភាពដឹកនាំអភិវឌ្ឍឃុំបន្ត។

លោក ពុំ ធឿន មេឃុំជ្រោយប្រស់ បានលើកឡើងថា រាល់សមិទ្ធផល ដែលបានកើតមាន​ក្នុង​មូលដ្ឋាននេះ​ គឺមិនជារឿងចៃដន្យនោះទេ ​គឺអាជ្ញាធរ បានគិតគូរយកចិត្តទុកយ៉ាងច្បាស់លាស់ តាមគ​ម្រោងផែនការមេនីមួយៗ ។

លោកមេឃុំ បានបន្ថែមថា ក្រៅពីគម្រោងអភិវឌ្ឍន៍របស់ឃុំ​ អាជ្ញាធរឃុំ បានសហការ​សម្របសម្រួល​ជា​មួយគម្រោងអភិវឌ្ឍន៍​របស់រាជរដ្ឋាភិបាល ​ក្រសួង ​និងមន្ទីរជំនាញពាក់ព័ន្ធផងដែរ ដើម្បី​ឱ្យហេដ្ឋារចនាសម្ព័ន្ធនានាកកើតមានក្នុងមូលដ្ឋាន។

លោកមេឃុំ បានប្តេជ្ញាចិត្តថា ​នៅពេលលោកជាប់ឆ្នោតជាមេឃុំជ្រោយប្រស់ ​អាណត្តិទី៥ លោក​នឹង​ពង្រឹងពង្រីកកសាងផ្លូវគមនាគមន៍​ រក្សាសន្តិសុខសន្តិភាព និងផ្តល់​សេវា​សាធារណៈជូន​ពលរដ្ឋ​ឱ្យកាន់តែឆាប់រហ័ស ​និងមានប្រសិទ្ធភាពខ្ពស់​ តបតាមគោលនយោបាយរបស់រាជរដ្ឋាភិបាលកម្ពុជា ដែលបានដាក់ចេញឱ្យអនុវត្ត។

ឃុំជ្រោយប្រស់ ជាឃុំមួយស្ថិតនៅក្នុងស្រុកកោះកុង ខេត្តកោះកុង ​មានប្រជាពលរដ្ឋរស់នៅចំនួន ជាង២ពាន់នាក់ ​ស្មើនឹង៥៤៥គ្រួសារ​ ដែលភាគច្រើន​ប្រកបមុខរបរនេសាទសមុទ្រ ​និង​កសិកម្ម។ ថ្វីត្បិតតែឃុំជ្រោយប្រស់ ​នៅទីជនបទឆ្ងាយដាច់ស្រយាលក៏ពិតមែន ​ប៉ុន្តែ​សន្ទុះ នៃការ​អភិវឌ្ឍហេដ្ឋារចនាសម្ព័ន្ធថ្មីៗ​ គួរឱ្យកត់សម្គាល់​ មិនចាញ់បណ្តាស្រុកក្រុងផ្សេងនោះឡើយ៕

អត្តបទ៖ ឈឹម មករា