ភ្នំពេញ៖ គណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា បាននិងកំពុងបន្តស្ថាបនាឆ្នេរខ្សាច់កម្សាន្តកម្រិតខ្ពស់ប្រវែង ២៧០០ម៉ែត្រ នៅក្នុងតំបន់ឆ្នេរសមុទ្រខេត្តកែបបន្ថែមទៀត ខណៈដែលបច្ចុបន្ន នៅកម្ពុជាមានឆ្នេរខ្សាច់កម្សាន្តនៅតាមតំបន់ឆ្នេរសមុទ្រចំនួនជាង៤០កន្លែងនោះ មិនទាន់អាចទ្រទ្រង់កំណើនភ្ញៀវទេសចរទៅលេងកម្សាន្តបាននោះទេ។

ថ្លែងក្រោយពិធីបិទ សិក្ខាសាលាផ្សព្វផ្សាយ ស្តីពីបទដ្ឋានគតិយុត្តនានាក្នុងការគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា នៅសាលាខេត្តកែប ថ្ងៃទី៣០ ខែឧសភានេះ ឯកឧត្តម នី ផល្លី អនុរដ្ឋលេខាធិការក្រសួងទេសចរណ៍ បានថ្លែងថា នៅពេលបច្ចុប្បន្នកម្ពុជាបានស្ថាបនាឆ្នេរដែលមានចាក់ខ្សាច់ស្អាតដើម្បីទទួលភ្ញៀវទេសចរទៅងូតទឹកសមុទ្រលេងកម្សាន្ត បានប្រមាណជាង ៤០កន្លែង និងមានឆ្នេរសមុទ្រដែលមានសក្តានុពលប្រមាណចំនួនជាង៧០កន្លែងទៀតនៅមិនទាន់បានធ្វើការកែច្នៃរចាក់ខ្សាច់ស្អាត។

ឯកឧត្តម នី ផល្លី បន្តថា សម្រាប់ឆ្នេរខ្សាច់តាមតំបន់មាត់សមុទ្រ ដែលយើងមាននៅពេលបច្ចុប្បន្ននេះ គឺនៅមិនទាន់អាចទ្រទ្រង់បាននូវការទទួលកំណើនភ្ញៀវទេសចរទៅងូតទឹកលេងកម្សាន្តបាននោះទេ ហើយវាតម្រូវអោយយើងត្រូវធ្វើការអភិវឌ្ឍន៍ឆ្នេរខ្សាច់ជាច្រើនកន្លែងទៀត។

បើតាមឯកឧត្តម លី រស្មី រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានថ្លែងថា នៅពេលបច្ចុប្បន្ននេះ គណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា បាននិងកំពុងបន្តអភិវឌ្ឍឆ្នេរសមុទ្រដោយត្រូវចាក់ខ្សាច់នៅតាមឆ្នេរសមុទ្រខេត្តកែបប្រវែង ២៧០០ម៉ែត្រ ដែលបច្ចុប្បន្នស្ថាបនាបានប្រមាណ១០% ខណៈ ឆ្នេរសមុទ្រខេត្តកែប ដែលមានឆ្នេរខ្សាច់កម្សាន្តប្រវែងជាង២០០ម៉ែត្រកន្លងមក គឺមិនអាចទ្រទ្រង់កំណើនភ្ញៀវទេសចរជាតិអន្តរជាតិទៅលេងកម្សាន្តបាននោះទេ។

ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានថ្លែងថា ជារួម បន្ទាប់ពីឆ្នេរសមុទ្រកម្ពុជាមាន៖ ឆ្នេរសមុទ្រនៅខេត្តកែប កំពត ព្រះសីហនុ និងខេត្តកោះកុង បានដាក់បញ្ចូលសមាជិកក្លឹបឆ្នេរសមុទ្រដែលស្អាតជាងគេបំផុតលើពិភពលោក នៅថ្ងៃទី២៥ ខែឧសភា ឆ្នាំ២០១១មក បណ្តាឆ្នេរសមុទ្រកម្ពុជានៅតាមបណ្តាខេត្តទាំងនេះ គឺទទួលបានការអភិវឌ្ឍតំបន់ឆ្នេរសមុទ្រជាបន្តបន្ទាប់ដើម្បីបង្កើនភាពទាក់ទាញភ្ញៀវទេសចរជាតិអន្តរជាតទៅទស្សនាកម្សាន្ត។

ឯកឧត្តម បញ្ជាក់ថា តាមស្ថិតិទេសចររយៈពេលបួនខែ ដើមឆ្នាំ២០២២ តំបន់ឆ្នេរសមុទ្រកម្ពុជា ទទួលបានទេសចរអន្តរជាតិមក កម្សាន្តមានចំនួនសរុប ១៨០,៦៥២ នាក់ កើនឡើង ៣១០.៥%បើធៀបនឹងឆ្នាំ២០២១ ហើយទេសចរជាតិមក កម្សាន្តមានចំនួនសរុប ១,៩៤៥,៤០៩នាក់ កើនឡើង ១១៤.៦%បើធៀបនឹងឆ្នាំ២០២១ មានចំនួនសរុប ៩០៦,៣៧២នាក់ ដោយឡែកខេត្តកែប សម្រាប់៥ខែដើមឆ្នាំ២០២២ ទទួលបានភ្ញៀវទេសចរមកទស្សនាសរុប៧,៧៥៩ នាក់ កើនឡើង ៣៨១%៕ អត្ថបទ៖ ស៊ុមសុខជា