អត្តពលកម្ម៖ លោក ប៉ែន វុទ្ធី ប្រធាននាយកដ្ឋានអប់រំកាយ និងកីឡានៃក្រសួងអប់រំ យុវជន និងកីឡាបានបង្ហាញការសាទរ និងគាំទ្រការរៀបចំការប្រកួតកីឡាអត្តពលកម្ម ជម្រើសជើងឯកវិទ្យាស្ថានខេមអេដប្រចាំឆ្នាំ២០២២ ដើម្បីសម្រិតសម្រាំងកីឡាករ-កីឡាការិនីឆ្នើមត្រៀមចូលរួមប្រកួតកីឡានិស្សិតឧត្តមសិក្សា និងមធ្យមសិក្សាបច្ចេកទេសនាចុងខែមិថុនា ឆ្នាំ២០២២ ខាងមុខ។
ការលើកឡើងរបស់មន្ដ្រីនាយកដ្ឋានជំនាញនៃក្រសួងអប់រំ យុវជន និងកីឡានេះ បន្ទាប់ពីវិទ្យាស្ថានខេមអេដបានរៀបចំការប្រកួតកីឡាអត្តពលកម្មជើងឯកប្រចាំឆ្នាំ២០២២ កាលពីចុងសប្ដាហ៍កន្លងទៅនៅពហុកីឡដ្ឋានជាតិ ដោយមានកីឡាករ-កីឡាការិនីដែលជានិស្សិតប្រមាណ ២០០នាក់បានចូលរួមប្រកួតលើ ៨វិញ្ញាសា។ លោក ប៉ែន វុទ្ធី បានកោតសរសើរ និងវាយតម្លៃខ្ពស់ចំពោះលោក ខេស៊ី បាណេត នាយកវិទ្យាស្ថានខេមអេដដែលខិតខំបំផុសចលនាកីឡា នៅក្នុងវិទ្យាស្ថានរបស់ខ្លួនជារៀងរាល់ឆ្នាំ ដើម្បីផ្តល់ឱកាសឲ្យនិស្សិតបានលេងកីឡាដើម្បីសុខភាព មិត្តភាព និងសាមគ្គីភាព ក៏ដូចជាផលិតធនធានប្រចាំវិទ្យាស្ថាន និងរួមចំណែកអភិវឌ្ឍន៍វិស័យកីឡាជាតិផងដែរ។
លោក ខេស៊ី បាណេត បានបញ្ជាក់ថា ខេមអេដគឺជាវិទ្យាស្ថានកម្រិតឧត្តមសិក្សា ហើយគោលបំណងចម្បងរបស់លោកគឺភាពជោគជ័យរបស់និស្សិតទាំងអស់គ្នាសម្រាប់ជីវិត តាមរយៈការអប់រំផង និងតាមរយៈការពង្រឹងសមត្ថភាពក្នុងកីឡាផង។
កីឡាមានមេរៀនជាច្រើនដែលជំរុញឲ្យកីឡាករ-កីឡាការិនី ជានិស្សិតទាំងអស់មានភាពក្លាហាន សុខភាពល្អ និងឲ្យនិស្សិតទាំងអស់មានគោលដៅជីវិតច្បាស់លាស់ ហើយការលេងកីឡានេះគឺជាការរួមចំណែកដ៏សំខាន់ ក្នុងការជំរុញបន្ថែមឲ្យនិស្សិតគ្រប់រូបឲ្យរីករាយ ការបណ្តុះស្មារតីលើមាគ៌ាឆ្ពោះទៅសម្រេចបាននូវគោលដៅ សម្រាប់ជីវិតរបស់ខ្លួនទៀតផង។ តាមរយៈនេះ លោកពិតជារីករាយក្នុងការរៀបចំនូវព្រឹត្តិការណ៍កីឡាជាច្រើនរៀងរាល់ឆ្នាំ ក្នុងនោះក៏មានការប្រកួតកីឡាអត្តពលកម្មផងដែរ ដើម្បីផ្ដល់ឱកាសឲ្យនិស្សិតបានចូលរួម និងបង្ហាញសមត្ថភាព ខណៈកីឡាករ-កីឡាការិនីដែលមានសមត្ថភាព នឹងទទួលបានឱកាសចូលរួមប្រកួតកីឡាថ្នាក់ឧត្តមសិក្សាផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
