បាល់ទាត់៖ UEFA បាន​បញ្ជាក់​ថា ​ខ្លួន​បានធ្វើការ​ត្រួតពិនិត្យ​ដោយ​ឯករាជ្យ​មួយ​ទៅលើ​ទិដ្ឋភាព​វឹកវរ មុន​ការប្រកួត​វគ្គ​ផ្តាច់ព្រ័ត្រ Champions League នៅ​ថ្ងៃ​សៅរ៍​។ ​

​សេចក្តីថ្លែងការណ៍​របស់ UEFA បាន​សរសេរ​ថា "UEFA ថ្ងៃនេះ​បាន​ប្រកាស​ថា ខ្លួន​បាន​ធ្វើ​របាយការណ៍​ឯករាជ្យ​មួយ​ទៅលើ​ព្រឹត្តិការណ៍​ជុំវិញ​ការប្រកួត​វគ្គ​ផ្តាច់ព្រ័ត្រ UEFA Champions League នៅ​ទីក្រុង​ប៉ារីស​នា​ថ្ងៃ​សៅរ៍ ទី​២៨ ខែឧសភា​។ ការ​ត្រួត​ពិនិត្យ​ដ៏​ទូលំទូលាយ​នឹង​ពិនិត្យមើល​ការ​សម្រេចចិត្ត ការទទួលខុសត្រូវ និង​អាកប្បកិរិយា​របស់​អង្គភាព​ទាំងអស់​ដែល​ពាក់ព័ន្ធ​នឹង​ការប្រកួត​វគ្គ​ផ្តាច់ព្រ័ត្រ​។​ រដ្ឋមន្ត្រី​កីឡា​បារាំង​លោកស្រី Amelie Oudea-Castera បាន​និយាយ​ថា គ្មាន​បញ្ហា​ឡើយ​សម្រាប់​អ្នក​គាំទ្រ Real Madrid ស្ថិត​ក្រោម​ការគ្រប់គ្រង​បាន​ល្អ​ពី​សំណាក់​ក្លិប​អេ​ស្ប៉ា​ញ​មួយ​នេះ តែ​អ្នកគាំទ្រ Liverpool ទេ​ដែល​កង្វះ​សណ្ដាប់ធ្នាប់​។

​ក្រោយមក​ប្រធាន​ក្លិប Liverpool លោក Tom Werner បាន​ស្នើ​សុំ​ឱ្យ​រដ្ឋមន្ត្រី​កីឡា​បារាំង​រូប​នេះ​សុំទោស​ជាបន្ទាន់ ចំពោះ​ការ​លើក​ឡើង​បែបនេះ​។ សូម​បញ្ជាក់​ថា ការប្រកួត​កាលពី​ថ្ងៃ​សៅរ៍​នៅ​ទីក្រុង​ប៉ារីស​ប្រទេស​បារាំង​នោះ អ្នកគាំទ្រ Liverpool ជាច្រើន​បាន​កកស្ទះ​តម្រង់​ជួរ​គ្នា​រង់ចាំ​ចូល​ទស្សនា ខណៈ​ការប្រកួត​ត្រូវ​បាន​ពន្យារពេល ៣០​នាទី​។ ប៉ូលិស​បារាំង​បាន​ប្រើ​ឧស្ម័ន​បង្ហូរទឹកភ្នែកដើម្បី​បំបែក​ភាព​អនាធិបតេយ្យ​នោះ​៕

​អត្ថបទ​៖​នាង សុភា​វុ​ធ