ភ្នំពេញ៖ ក្រសួងពាណិជ្ជកម្ម បានឲ្យដឹងថា ឆ្លងកាត់ការបោះឆ្នោតយ៉ាងត្រឹមត្រូវ ជាលទ្ធផលលោក ឡេននី វង់ ជាជនជាតិខ្មែរ-កាណាដា បានជាប់ឆ្នោតជាប្រធាន និង៨រូបផ្សេងទៀត ជាប់ជាសមាជិកការិយាល័យតំណាងសភាពាណិជ្ជកម្មកម្ពុជា នៅទីក្រុងតូរ៉ុនតូ ខេត្តអុនតារីយ៉ូ ប្រទេសកាណាដា សម្រាប់អាណត្តិទី១ លើកទី១។

ប្រភពពីក្រសួងពាណិជ្ជកម្ម នៅថ្ងៃទី៣០ ខែឧសភា ឆ្នាំ២០២២ បានឱ្យដឹងថា ក្រោយចប់ពិធី​បោះឆ្នោត​ជ្រើសរើស​ប្រធាន និងសមាជិកការិយាល័យតំណាងសភាពាណិជ្ជកម្ម​កម្ពុជា​នៅ​ប្រទេសកាណាដា ដែលប្រារព្ធធ្វើឡើងតាមប្រព័ន្ធវីដេអូ ការិយាល័យ​តំណាងនេះ ​នឹង​ដើរតួនាទីយ៉ាង​សំខាន់ នៅ​ក្នុងការ​សម្របសម្រួល​កិច្ច​ពាណិជ្ជកម្ម រវាងកម្ពុជា​ និងកាណាដា ក៏ដូចជា​ជួយជំរុញ និងទាក់ទាញវិនិយោគិនកាណាដាមកវិនិយោគនៅកម្ពុជា​ឱ្យកាន់តែច្រើនឡើង។

នៅក្នុងពិធីបោះឆ្នោតនេះ ឯកឧត្តម ម៉ៅ ថូរ៉ា រដ្ឋលេខាធិការក្រសួងពាណិជ្ជកម្ម និងជាប្រធាន​គណៈកម្មការ​រៀបចំ​ការបោះឆ្នោតបង្កើតការិយាល័យតំណាងសភាពាណិជ្ជកម្មកម្ពុជា​នៅ​ប្រទេស​កាណាដា ​បានបញ្ជាក់ឲ្យដឹងថា ​កម្មវិធីបោះឆ្នោតនេះ គឺដើម្បីជ្រើសរើសបេក្ខភាពចំនួន ៩រូប ដែល​នឹងត្រូវក្លាយទៅជាសមាជិក ហើយក៏ជាការិយាល័យតំណាងឱ្យសភាពាណិជ្ជកម្មកម្ពុជាទី១ ដែលមានស្នាក់ការនៅក្រៅប្រទេសផងដែរ។

ឯកឧត្តម បានបន្តថា ចំពោះការបោះឆ្នោតនេះដែរ​ បានដំណើការប្រកបដោយរលូន និងស្របតាម​នីតិវិធី​ដោយបានរៀបចំជា២ដំណាក់កាល ដូចជាទី១៖ ការរៀបចំបោះឆ្នោតជ្រើសរើស​សមាជិក​ការិយាល័យ​តំណាង​ចំនួន ៩រូប និងទី២៖ ការរៀបចំបោះឆ្នោតជ្រើសរើសប្រធានក្នុងចំណាម​សមាជិក​ដែលបានជាប់ឆ្នោតចំនួន ៩រូប។

សូមបញ្ជាក់បន្ថែមថា លោក ឡេននី វង់ ជាជនជាតិខ្មែរ-កាណាដា ​គឺជាអគ្គនាយកក្រុមហ៊ុន Ocean Packers Inc ( Canada), TG Fishery Holdings Corporation ( Viet Nam) និង Canson Canada Investments (Canada) Ltd៕អត្ថបទ៖ ឈិត បូរ៉ាវី