សហភាពអឺរ៉ុប៖ មេដឹកនាំសហភាពអឺរ៉ុបកាលពីថ្ងៃចន្ទបានគាំទ្របម្រាមលើការនាំចូលប្រេងពីរុស្ស៊ីភាគច្រើន បន្ទាប់ពីមានកិច្ចព្រមព្រៀងសម្របសម្រួលជាមួយប្រទេសហុងគ្រី ដើម្បីដាក់ទណ្ឌកម្មលើទីក្រុងមូស្គូជុំវិញសង្គ្រាមនៅអ៊ុយក្រែន។
ប្លុកដែលមានប្រទេសចំនួន ២៧ បានចំណាយពេលជាច្រើនសប្ដាហ៍ ដើម្បីជជែកគ្នាលើការហាមឃាត់ទាំងស្រុងចំពោះប្រេងរបស់រុស្ស៊ី ប៉ុន្តែបញ្ហាមួយចំនួនបានកើតឡើង ដោយការជំទាស់ដ៏រឹងរូសរបស់នាយករដ្ឋមន្ត្រីហុងគ្រីលោក Viktor Orban។ ជុំវិញកិច្ចព្រមព្រៀងហាមឃាត់ការនាំចេញប្រេងរបស់រុស្ស៊ីទៅកាន់សហភាពអឺរ៉ុប ប្រធានក្រុមប្រឹក្សាអឺរ៉ុបលោក Charles Michel បានសរសេរលើបណ្ដាញ Twitter ថា បញ្ហានេះបានគ្របដណ្ដប់ភ្លាមៗលើការនាំចូលប្រេងជាងពីរភាគបីពីប្រទេសរុស្ស៊ី ដោយកាត់បន្ថយប្រភពហិរញ្ញវត្ថុដ៏ច្រើនសម្រាប់ម៉ាស៊ីនសង្គ្រាមរបស់រុស្ស៊ី។
ប្រធានាធិបតីអ៊ុយក្រែនលោក Volodymyr Zelenskyy ដែលបានថ្លែងទៅកាន់ប្រមុខរដ្ឋ និងរដ្ឋាភិបាលទាំង ២៧ប្រទេសតាមបណ្តាញវីដេអូកាលពីល្ងាចថ្ងៃចន្ទ បានទាមទារម្តងហើយម្តងទៀតឱ្យសហភាពអឺរ៉ុប កំណត់គោលដៅលើវិស័យថាមពលដែលអាចរកប្រាក់ចំណូលបានច្រើនរបស់រុស្ស៊ី និងផ្អាកប្រាក់រាប់ពាន់លានដុល្លាររបស់ទីក្រុងមូស្គូជារៀងរាល់ថ្ងៃក្នុងការទូទាត់ផ្គត់ផ្គង់។ ប្រទេសហុងគ្រីបានដឹកនាំប្រទេសមួយក្រុមមានប្រទេសស្លូវ៉ាគី សាធារណរដ្ឋឆេក និងប៊ុលហ្គារីដែលពឹងផ្អែកលើប្រេងរបស់រុស្ស៊ី ហើយមិនអាចមានលទ្ធភាពចាត់វិធានការធ្វើបែបនេះបាននោះទេ។ ហុងគ្រីទទួលបានប្រេងច្រើនជាង ៦០% ពីរុស្ស៊ី និង ៨៥% នៃឧស្ម័នធម្មជាតិរបស់ខ្លួន។ សហភាពអឺរ៉ុបបានដាក់ទណ្ឌកម្មចំនួន ៥លើករួចមកហើយលើរុស្ស៊ីជុំវិញសកម្មភាពរបស់ប្រទេសនេះនៅអ៊ុយក្រែន៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
