ព្រៃវែង៖ ឯកឧត្តម នេត សាវឿន ប្រធានក្រុមការងាររាជរដ្ឋាភិបាល ចុះមូលដ្ឋានស្រុកកញ្ជ្រៀច និង​ស្រុក​ស្វាយ​អន្ទរបានចាត់តាំងឯកឧត្តម ប៉ុល រតនា ប្រធានក្រុមការងាររាជរដ្ឋាភិបាល ចុះមូលដ្ឋាន​ឃុំចុងអំពិល ស្រុកកញ្ជ្រៀច​នាំយកម៉ាស៊ីន​អេកូស្កេន​បំពាក់​ដោយសម្ភារៈ​បរិក្ខា​ទំនើប​សម្រាប់​ពិនិត្យផ្ទៃពោះ និងជម្ងឺផ្សេងៗ ដើម្បីជាផលប្រយោជន៍សំរាប់ជួយដល់ប្រជាពលរដ្ឋ ក្នុងមន្ទីរពេទ្យបង្អែកកញ្ជ្រៀច ខេត្តព្រៃវែង។

ថ្លែងនៅក្នុងពិធីប្រគល់នូវម៉ាស៊ីនដ៏ទំនើបនេះ ឯកឧត្តម ប៉ុល រតនាបានលើកឡើងថា ម៉ាស៊ីនអេកូស្កេនបំពាក់ដោយសម្ភារៈបរិក្ខាទំនើប ពិនិត្យផ្ទៃពោះ និងជំងឺ​ផ្សេង ​និង​ជួយ​អោយ​ប្រជាពលរដ្ឋ​ដែលរស់នៅឆ្ងាយកាត់បន្ថយពេលវេលាក្នុងការស្វែងរកសេវាព្យាបាលនៅទីរួមខេត្ត និងអាចជួយព្យាបាលអ្នកជំងឺទាន់ពេលវេលាផងដែរ។

នៅក្នុងពិធីនោះដែរ ឯកឧត្តម​បាន​ថ្លែងអំណរ​គុណ​ដល់​ក្រុម​គ្រូពេទ្យ​ទាំងអស់​ដែល​បាន​លះបង់​កម្លាំង​កាយចិត្តជួយព្យាបាលអ្នកជំងឺដែលបានចូលមកសម្រាកក្នុងមន្ទីរពេទ្យ។ ប៉ុន្តែឯកឧត្តម នៅតែបន្តអំពាវនាវដល់លោកគ្រូ អ្នកគ្រូពេទ្យទាំងអស់បន្តយកចិត្តទុកដាក់ឲ្យបាន ល្អប្រសើ​បន្ថែម​ទៀត​ក្នុងការបំរើ និងព្យាបាលដល់អ្នកជំងឺនោះ។

ក្រៅពីប្រគល់នូវម៉ាស៊ីនស្កេនដ៏ទំនើបនេះ ឯកឧត្តម ប៉ុល រតនា ក៏បានឆ្លៀតឱកាសចុះសួរសុខទុក្ខ ដល់បងប្អូនប្រជាពលរដ្ឋដែលកំពុងសម្រាកព្យាបាលជម្ងឺ ព្រមទាំងសន្យាជួយជួសជុល កែលម្អ បំពាក់​ពិដានអគារព្យាបាលជំងឺ ១ខ្នងផងដែរ៕ អត្ថបទ៖ បាន ចក់