ឧត្តរមានជ័យ៖ ប្រជាពលរដ្ឋរាប់រយនាក់ មកពីបណ្តាក្រុងស្រុកទាំងប្រាំ ក្នុងភូមិសាស្រ្តខេត្តឧត្តរមានជ័យ នាំគ្នាមកទទួលការផ្តល់សេវាការពិនិត្យព្យាបាលជំងឺភ្នែកដោយ​ឥតគិតថ្លៃនៅមន្ទីរពេទ្យបង្អែកខេត្តឧត្តរមានជ័យ នាព្រឹកថ្ងៃទី១ មិថុនា ឆ្នាំ២០២២។

ប្រជាពលរដ្ឋឈ្មោះ ខីន ខ័ណ្ឌ មានទីលំនៅរស់នៅភូមិតាប៉ែន ឃុំពង្រ ស្រុកចុងកាល់ ខេត្តឧត្តរមានជ័យ ដែលមានបញ្ហាជំងឺភ្នែកអស់រយៈពេលរាប់ឆ្នាំមកហើយនោះ បានសម្ដែង​នូវការ​ត្រេកអរ​នឹងអរគុណ​យ៉ាងខ្លាំង​ដល់​ប្រមុខរាជរដ្ឋាភិបាល​កម្ពុជា ​ក៏ដូចជាក្រុមគ្រូពេទ្យទាំងអស់​ដែល​បាន​ចំណាយពេលវេលា ដ៏សំខាន់មកជួយសង្រ្គោះដល់អាយុជីវិត​របស់​ពួកគាត់​ក្នុងការ​ពិនិត្យ​ព្យាបាល​ជំងឺភ្នែក​ដោយ​ពុំមានការយកថ្លៃអ្វីទាំងអស់។

ពលរដ្ឋដដែល បានបន្តថា ទាំងអស់នេះ​ស​បញ្ជាក់​ឲ្យ​ឃើញកាន់​តែ​ច្បាស់​ពី​ការ​យកចិត្តទុកដាក់​របស់​ថ្នាក់ដឹក​នាំ​ខេត្តពិសេសនោះ សម្តេចតេជោ ​នាយករដ្ឋមន្រ្តី​នៃកម្ពុជា ​ដែលបច្ចុប្បន្ន​សម្តេច​តែងតែ​យក​ចិត្តទុក​ដាក់គិតគូរខ្ពស់​ពី​បញ្ហា​សុខភាព​របស់​ប្រជាពលរដ្ឋ​ និង​បាន​ជួយ​នូវរាល់​បញ្ហាប្រឈម និងទុក្ខលំបាកនានា​មកលើ​ប្រជាពលរដ្ឋ​ដែល​មាន​ជីវភាពក្រីក្រ​ដែលគ្មាន​លទ្ធិភាព​ក្នុងការ​ព្យាបាលជំងឺភ្នែកនេះផងដែរ។

ក្នុងឱកាសនោះលោកវេជ្ជបណ្ឌិត លី ឡុងឌី មន្រ្តី​ជំនាញ​ព្យាបាលជំងឺភ្នែក ​បានឲ្យដឹងថា ការ​ពិនិត្យព្យាបាលជំងឺសុខភាពភ្នែក ជូនដល់បងប្អូនប្រជាពលរដ្ឋនៅមន្ទីរពេទ្យបង្អែកខេត្ត គឺជា​កម្មពិធីជាតិសុខភាពភ្នែកដែលមានរយៈពេល៤ថ្ងៃ ចាប់ពីថ្ងៃទី៣០ ឧសភា រហូតដល់ថ្ងៃទី២ ខែមិថុនា ឆ្នាំ២០២២ នឹងត្រូវបានបញ្ចប់។

ក្នុងនោះ​មានការពិនិត្យព្យាបាលទៅលើការ​ ពិគ្រោះជំងឺភ្នែក​ ការវះកាត់ភ្នែក ពិនិត្យព្យាបាល​បាយភ្នែក ​នឹងជំងឺផ្សេងៗ​ផងដែរ។

ជាលទ្ធិផលក្រុមការងារ​សម្រេច​បាន​ លើ​ការ​ពិនិត្យ​និងព្យាបាលអ្នកជំងឺ​ជា​បឋម​រួមមាន​៖ ផ្នែកពិគ្រោះជំងឺបាន ១១១ករណី ស្រី៧៦នាក់ ​ ផ្នែកវះកាត់ភ្នែកបាន ៤៥ករណី ផ្នែកបាយភ្នែកបាន ៤១ករណី​ស្រី២៦នាក់ និងផ្នែកពិនិត្យផ្សេងៗបាន៤ករណី៕អត្ថបទ៖ ឃិន សារិទ្ធ