ភ្នំពេញ៖ មន្រ្តីសុខាភិបាល បានត្រៀមខ្លួនរួចរាល់ក្នុងការចាក់វ៉ាក់សាំងដូសជំរុញទី៥ ជូនក្រុមអាទិភាព ដែលនឹងចាប់ផ្ដើមនៅសប្ដាហ៍ក្រោយ បន្ទាប់ពីទទួលបានការអនុញ្ញាតពីសម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា។

មន្ត្រីសុខាភិបាល បម្រើការនៅរាជធានីភ្នំពេញ បានឱ្យដឹងថា ការចាក់វ៉ាក់សាំងដូសទី៥ ដើម្បី បង្កើន​អង់ទីគ័រការពាររាងកាយទប់ទល់នឹងជំងឺកូវីដ-១៩ ​ជូនមន្រ្តីជួរមុខ​ និងក្រុមគោលដៅអាទិភាព នឹងចាប់ផ្តើមពីថ្ងៃទី៩ ខែមិថុនានេះតទៅ។

មន្រ្តីសុខាភិបាល បានបញ្ជាក់ថា ការចាក់វ៉ាក់សាំងដូសជំរុញទី៥នេះ ​នឹងអាចធានា​សុវត្ថិភាព បន្ថែម​ទៀត​ចំពោះការរស់នៅពេលបច្ចុប្បន្ន និងអនាគត ​របស់ប្រជាពលរដ្ឋ ​ជាមួយនឹងមេរោគកូវីដ-១៩។

ទោះបីបច្ចុប្បន្ន ស្ថានភាពជំងឺកូវីដ-១៩​ នៅប្រទេសកម្ពុជា ​មានភាពល្អប្រសើរក្តី ​តែការចាក់វ៉ាក់សាំង ត្រូវបានរាជរដ្ឋាភិបាលកម្ពុជា ​បន្តចាត់ទុកជាឧបករណ៍ដ៏សំខាន់បំផុត​ សម្រាប់បុគ្គលគ្រប់ៗរូប ដើម្បី ការពារខ្លួន​ទប់ទល់​នឹងការវាយលុកធ្ងន់ធ្ងរពីជំងឺកូវីដ-១៩ ​កាត់​បន្ថយ​អត្រា​មរណភាព​ជា​អតិបរមា និង​ផលប៉ះពាល់​សង្គមជាថ្មីជាដើម។ ​ការចាក់វ៉ាក់សាំងដូសទី៥ ​នឹងប្រើប្រាស់វ៉ាក់សាំងជំនួយ​ពី​ប្រទេសចិន​ ឥណ្ឌា អ៊ីតាលី ​និងប្រទេសផ្សេងៗ​មួយចំនួនទៀត។ ​នេះបើតាមការឱ្យដឹងពីប្រធាន គណៈកម្មការចំពោះកិច្ចចាក់ ​វ៉ាក់សាំងបង្ការជំងឺកូវីដ-១៩ ​ក្នុងក្របខណ្ឌទូទាំងប្រទេស លោកជំទាវវេជ្ជបណ្ឌិត ឱ វណ្ណឌីន។

បច្ចុប្បន្នប្រទេសកម្ពុជា បាននឹងកំពុងដំណើរការសេដ្ឋកិច្ចធម្មតា ជាមួយវត្តមានជំងឺកូវីដ-១៩ ក្រោយ​ពេលរាជរដ្ឋាភិបាលទទួលបានជោគជ័យ​លើ​នយោបាយចាក់វ៉ាក់សាំង​ស្រោច​លើ​ប្រជាពលរដ្ឋ ​ចាប់ ពីដូសមូលដ្ឋាន ​រហូតដល់ដូសជំរុញ៕អត្ថបទ៖ ទូច សោភ័ណ