កែប៖ នៅឆ្នាំ២០២២នេះ អង្គការសុខភាពពិភពលោក បានសម្រេចជូនពានរង្វាន់មួយទៀតដល់កម្ពុជា តាមរយៈក្រសួងទេសចរណ៍ ដែលបានចូលរួមយ៉ាងសកម្មក្នុងការលើកកម្ពស់វិស័យទេសចរណ៍គ្មានផ្សែងបារី នៅកម្ពុជា ដែលនេះបញ្ជាក់អំពីភាពឈានមុខគេរបស់កម្ពុជា ក្នុងការទប់ស្កាត់ និងឈានទៅលុបបំបាត់ផល ប៉ះពាល់ដែលកើតមកពីផលិតផលថ្នាំជក់។

នៅក្នុងឆ្នាំ២០២១ អង្គការសុខភាពពិភពលោក បានផ្ដល់ពានរង្វាន់ទិវាពិភពលោកគ្មានថ្នាំជក់ ចំនួន២ ជូនព្រះរាជាណាចក្រកម្ពុជា ដោយសារមើលឃើញអំពីការអនុវត្តបានល្អ លើការដាក់ចេញ​នូវ​ច្បាប់ហាមឃាត់ និងវិធានការផ្សេងៗរបស់រាជរដ្ឋាភិបាលកម្ពុជា ពីគ្រោះថ្នាក់ នៃផលិតផលថ្នាំជក់ ដល់ប្រជាជន ដែលមានភាពលេចធ្លោ និងឈានមុខគេក្នុងតំបន់​ក្នុងការ​អនុវត្តការងារ​ត្រួត​ពិនិត្យ​ផលិតផលថ្នាំជក់។

នេះបើតាមការលើកឡើងរបស់ឯកឧត្តមវេជ្ជបណ្ឌិត អ៊ឹង ភីរុន រដ្ឋលេខាធិការក្រសួងសុខាភិបាល ក្នុងទិវាពិភពលោកគ្មានថ្នាំជក់ ឆ្នាំ២០២២ ដែលធ្វើឡើងនៅខេត្តកែប ក្រោមប្រធានបទ “ថ្នាំជក់គំរាម កំហែងដល់បរិស្ថានរបស់យើង» កាលពីថ្ងៃទី៣១ ខែឧសភាម្សិលមិញ។

ឯកឧត្តម បានបញ្ជាក់ថា បារីធ្វើឲ្យប៉ះពាល់ខ្លាំងណាស់ដល់សុខភាព មនុស្ស សត្វ និងបរិស្ថាន ដោយផ្ទាល់និងប្រយោល។ រៀងរាល់ឆ្នាំ នៅទូទាំងពិពភលោក ដើមឈើចំនួន ៦០០លានដើម ត្រូវបានកាប់ដើម្បីផលិតបារី (ឈើប្រហែល១ដើម ផលិតបារីបានប្រមាណ១៥កញ្ចប់) ហើយការ​ដឹក​ជញ្ជូនឈើ និងផលិតផលផ្សេងៗទៅរោងចក្រធ្វើឱ្យបំពុលខ្យល់ និងបង្កជំងឺផ្លូវដង្ហើម។

ទន្ទឹមគ្នានោះដែរ កន្ទុយបារី ប្រមាណចំនួន ៤.៥ពាន់ពាន់លានកន្ទុយ ​ត្រូវបាន​បោះចោល ដែល​វា​បំពុល​ភាវរស់ក្នុងដី និងទឹកពិសេសត្រីផ្ទុកសារជាតិគីមីពុល ដែលបង្កឲ្យមានជំងឺដល់​ អ្នកបរិភោគ និងជំងឺផ្សេងៗទៀត ​កើតចេញពីការបរិភោគទឹកមានសារធាតុថ្នាំជក់។ ពេញមួយវដ្ដជីវិតរបស់បារី (តាំងពីផលិត រហូតដល់ការបោះចោលកន្ទុយ) ថ្នាំជក់​បំភាយ​កាបូនអុកស៊ីត ជាង​៨០លានតោន​ជារៀងរាល់ឆ្នាំ ​ខណៈដែលបារីមួយដើម​ អាចផ្ទុកឧស្ម័នកាបូនិចរហូតដល់ ១៤ក្រាម និងប្រើប្រាស់​ទឹក​ប្រហែល ៣.៧លីត្រ សម្រាប់ផលិតវា។

ឯកឧត្តម សោម ពិសិដ្ឋ អភិបាលខេត្តកែប ​បានលើកឡើងថា ​កន្លងទៅរដ្ឋបាលខេត្ត បាន​ប្រឹងប្រែងក្នុងការអនុវត្តច្បាប់ និងវិធានការហាមឃាត់នានា ​ដែលរាជរដ្ឋាភិបាល និង​ក្រសួង​បានដាក់ចេញ ​ក្នុងន័យឈានទៅទប់ឱ្យ បានទាំងស្រុងនូវការចរាចរទីផ្សារបារីនៅខេត្តកែប។

ឯកឧត្ដម ​បានបន្ថែមថា ​នៅមានបញ្ហាប្រឈមមួយចំនួន ដូចជា នៅមាន​ការ​ផ្សព្វផ្សាយ​ពាណិជ្ជកម្ម​ផលិត ផលថ្នាំជក់ តាមរយៈនារីរបស់ក្រុមហ៊ុនថ្នាំជក់​ ជំរុញដល់ការលក់បារីក្នុងខេត្ត និង​មាន​ផ្សព្វផ្សាយ​ពាណិជ្ជកម្មផលិត ​ផលថ្នាំជក់នៅលើ​ជញ្ជាំង​រថយន្តជាដើម៕ អត្ថបទ៖ អន សារឹម