ភ្នំពេញ៖ លោកវេជ្ជបណ្ឌិត លី សូវ៉ាន់ ប្រធាននាយកដ្ឋានប្រយុទ្ធ និងជំងឺឆ្លង និងជាអ្នកនាំពាក្យ ក្រសួងសុខាភិបាល បានឱ្យដឹងនៅថ្ងៃទី៣១ខែឧសភានេះថា ថ្មីៗនេះកម្ពុជាបានរកសង្ស័យ ជំងឺអ៊ុត ស្វា​ចំនួន៦ករណី ប៉ុន្តែក្រោយពីយកវត្ថុវិភាគទៅពិនិត្យ នៅវិទ្យាស្ថានប៉ាស្ទ័រ កម្ពុជាលទ្ធផល បង្ហាញថា​អវិជ្ជមានទាំងអស់។

លោកវេជ្ជបណ្ឌិត បានបន្តថា រហូតមកដល់ ពេលនេះនៅមិនទាន់មានអ្នកដំណើរ មកពីក្រៅ ប្រទេស ណាម្នាក់ត្រូវបានរកឃើញថា មានឆ្លងជំងឺអ៊ុតស្វានៅឡើយ ទេពោលគឺមានតែករណី សង្ស័យចំនួន ៦ ករណី នៅក្នុងស្រុកប៉ុណ្ណោះដោយពួកគាត់ មាន​រោគ​សញ្ញា​កន្ទួល​នៅលើស្បែក​ហើយត្រូវបាន ក្រុមការងារ​ឆ្លើយតប​បន្ទាន់​យក​វត្ថុសំណាក​ទៅវិភាគ​នៅវិទ្យាស្ថានប៉ាស្ទ័រ កម្ពុជាហើយជាលទ្ធផល អវិជ្ជមានទាំងអស់មិនមែនជាជំងឺអ៊ុតស្វា​ទេវាជាជំងឺផ្សេង​ដែលចេញ​រោគ​សញ្ញា​កន្ទួល​នៅលើស្បែកដែរ។

លោកវេជ្ជបណ្ឌិត បានបន្តទៀតថា ទោះបើជាមិនមានករណីឆ្លងជំងឺអ៊ុតស្វា ក៏មន្ត្រីឆ្លើយតប​បន្ទាន់ នៅទូទាំងប្រទេសបន្តរុករកជំងឺនេះ ជាបន្តទៀតទាំងនៅតាមព្រំដែន និងនៅក្នុងសហគមន៍។

លោកវេជ្ជបណ្ឌិតបានលើកទឹកចិត្ត ដល់បងប្អូនប្រជាពលរដ្ឋដែលឃើញករណីសង្ស័យ ​មាន​ជំងឺអ៊ុតស្វា​ដែលមាន​រោគសញ្ញា​ដូចជាក្តៅខ្លួន​ឈឺក្បាលខ្លាំង ​ហើមកូនកណ្ដុរឈឺសាច់ដុំ ​និងចេញ កន្ទួល​ដែលមានពងបែក​កន្តួល​មាន​ទំនោរប្រមូលផ្ដុំនៅលើមុខ បាតដៃ ​និងបាតជើង មាត់​ត្រូវ​ប្រញាប់ រាយការណ៍​ទៅអាជ្ញាធរសុខាភិបាល ឬតេទៅលេខ ១១៥​ ជាបន្ទាន់ដើម្បីយកវត្ថុវិភាគ ទៅ​ធ្វើរោគ​វិនិច្ឆ័យ​រក​ជំងឺអ៊ុតស្វាឱ្យបានទាន់ពេលវេលា។

លោកវេជ្ជបណ្ឌិត បានលើកឡើងទៀតថា ជំងឺអ៊ុតស្វានេះ ​ត្រូវបានគេរកឃើញនៅប្រទេសអាហ្វ្រិក​ខាងលិច ​និងអាហ្វ្រិកកណ្តាល​ដែលបច្ចុប្បន្ននេះ បានឆ្លងនៅក្នុង​សហគមន៍​នៃ​បណ្តាប្រទេសអឺរ៉ុប​មួយចំនួន កាណាដា អូស្ត្រាលី និងអាមេរិក ដោយអ្នក​ជំងឺទាំងនោះ​មិនបានធ្វើដំណើរ​ទៅ​អាហ្វ្រិកនោះទេ។

ថ្មីៗនេះ​ប្រទេសថៃ ​ជាប់ប្រទេសកម្ពុជា​ក៏​បានរកឃើករណីជំងឺអ៊ុតស្វា ១​ករណី ​និងសង្ស័យ១២ករណី ​ដែលអ្នកឆ្លង​បានធ្វើដំណើរមកពីអឺរ៉ុប​ដែល​ត្រូវ​ធ្វើចត្តាឡីស័ក៧​ថ្ងៃ​ ក្នុងករណីអត់ចេញរោគសញ្ញាតែបើចេញរោគសញ្ញា ឬវិជ្ជមានត្រូវព្យាបាលជំងឺប្រើរយៈពេល២១ថ្ងៃ៕អត្ថបទ៖ ឌី ពៅយី