បាល់ទាត់៖ ក្រុមបាល់ទាត់ខេត្តកែប ក្រុមលេខ៣ ពានរង្វាន់ថ្នាក់ខេត្តឆ្នាំ២០២០ មកដល់ពេលនេះមិនទាន់មានការជួបជុំ រឺប្រមូលផ្តុំដើម្បីធ្វើការហ្វឹកហាត់ជុំគ្នាទេ តាំងពីលើកពេលប្រកួត ដោយសារព្រឹត្តិការណ៍សហគមន៍ ២០កុម្ភៈ។
លោក លឹម ឆាវរ៉ាត់ អ្នកចាត់ការក្រុមបាល់ទាត់ជម្រើសខេត្តកែប បានប្រាប់ឲ្យដឹងថ្មីៗនេះថា ក្រុមកីឡាកររបស់លោកមិនមានការប្រមូលផ្តុំនោះទេ ដោយសារតែបញ្ហាប្រឈមជំងឺរាតត្បាតសកលកូវីដ-១៩ ម្ស៉ាងទៀតដោយសារមានការកែប្រែកម្មវិធី។ លោកបន្តថា ការប្រកួតទី៣ ដែលលើកមកលេងនៅថ្ងៃទី៣០ ខែមិនា ជាមួយខេត្តព្រះសីហនុនៅខេត្តព្រះសីហនុ មិនប្រាកដថាបានលេងនោះដែរ ខណៈខេត្តកែបថ្មីៗនេះមានវិជ្ជមានកូវីដ-១៩ម្នាក់ និងខេត្តព្រះសីហនុនៅតែប្រឈមដូចគ្នា។ អ្នកចាត់ការរូបនេះបន្ថែមថា តែទោះយ៉ាងនេះក្តីក៏កូនក្រុមរបស់លោក ហ្វឹកហាត់រៀងៗខ្លួននៅតាមគេហដ្ឋាន។
ក្រុមបាល់ទាត់ខេត្តកែបបានដំណើរការ ២ប្រកួតហើយ ប្រកួតដំបូងនៅទឹកដីកោះកុងស្មើខេត្តកោះកុង ១ទល់នឹង១ ទោះបីនាំមុខមុន និងប្រកួតទី២ ឈ្នះខេត្តកំពត ៥ទល់នឹង២។ ចំនែកខេត្តកំពត ២ប្រកួតដំបូង ឈ្នះព្រះសីហនុ ១ទល់នឹង០ និងចាញ់ខេត្តកោះកុង ០ទល់នឹង២ ក្នុងពូល E៕
អត្ថបទ៖ គង់ ហួន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
