​បាល់ទាត់៖ ​សហព័ន្ធ​បាល់ទាត់​ពិភពលោក FIFA បាន​សំរេច​ដាក់​ពិន័យ​បន្ថែម​លើ​អតីត​ប្រធាន FIFA លោក Sepp Blatter មិន​ឲ្យ​ពាក់ព័ន្ធ​នឹង​សកម្មភាព ​បាល់ទាត់​រហូត​ដល់​ឆ្នាំ​២០​២៨​។ ​ការ​ដាក់​ពិន័យ​បន្ថែម​នេះ​គឺ​មាន​រយៈពេល ៦ឆ្នាំ ៨ខែ​បន្ថែម​ទៀត ខណៈ​អតីត​អគ្គលេខាធិការ FIFA លោក Jerome Valcke ក៏​ទទួល​បាន​ការ​ដាក់​ពិន័យ​បន្ថែម​ស្រដៀង​គ្នា ហើយ​អ្នក​ទាំងពីរ​សុទ្ធតែ​ត្រូវ​បាន​ពិន័យ​ជា​ទឹកប្រាក់ ៧៨​ម៉ឺន​ផោន​ដូចគ្នា​។

​​ការ​ដាក់​ពិន័យ​បន្ថែម​នេះ​ នឹង​ចាប់ផ្ដើម​នៅ​ពេល​ការ​ពិន័យ​របស់​លោក Sepp Blatter វ័យ ៨៥ឆ្នាំ​អស់​សុពលភាព​នៅ​ខែ​តុលា​ខាងមុខ ខណៈ​លោក Jerome Valcke​ បទ​ពិន័យ​ថា​នឹង​អស់​សុពលភាព​នៅ​ខែ​តុលា ​ឆ្នាំ​២០២៥​។​ ​សេចក្តី​ថ្លែងការណ៍​រប​ស់ FIFA បាន​សរសេរ​ថា​ ការស៊ើបអង្កេត​ទៅលើ​លោក Blatter និង Valcke​ បាន​គ្រប​ដណ្ដប់​លើ​ការចោទប្រកាន់​ផ្សេងៗ​ ជាពិសេស​ទាក់ទង​នឹង​ការ​ទូទាត់​ប្រាក់​រង្វាន់​ ទាក់ទង​នឹង​ការប្រកួត​របស់ FIFA ដែល​ត្រូវ​បាន​បង់​ទៅ​ឲ្យ​ថ្នាក់ដឹកនាំ​កំពូល​របស់ FIFA ការ​ធ្វើ​វិសោធនកម្ម​ផ្សេងៗ ​និង​ការពង្រីក​កិច្ចសន្យាការងារ​ក៏ដូចជា​សំណង​ដោយ FIFA នៃ​ការ​ចំណាយ​ផ្នែក​ច្បាប់​ឯកជន​ក្នុង​ករណី​លោក Valcke​។​

​នៅ​ក្នុង​ការស្រាវជ្រាវ​បន្ថែម អង្គ​ជំនុំជម្រះ​ស៊ើបអង្កេត​បាល់ទាត់​ពិភពលោក​ បាន​រក​ឃើញ​ថា ​លោក Blatter បាន​ទទួលយក "​ផលប្រយោជន៍​ហិរញ្ញវត្ថុមិន​ត្រឹមត្រូវ​" ១៨លាន​ផោន​ចន្លោះ​ឆ្នាំ២០១០ ដល់​ឆ្នាំ​២០១៤​។​ ​រំលឹក​ថា ដំបូង​ឡើយ Blatter ត្រូវ​បាន​ដាក់​ពិន័យ​ដោយ FIFA ៨​ឆ្នាំ​ហើយ​ ក្រោយមក​ត្រូវ​បាន​កាត់​បន្ថយ​មក​នៅ​ត្រឹម ៦ឆ្នាំ​វិញ​ដោយសារ​ការរំលោភ​ក្រមសីលធម៌ ​នៅ​ពេល​ដែល​គាត់​ត្រូវ​បាន​គេ​រក​ឃើញ​ថា ​បាន​បង់​ប្រាក់​សំណូក ១.៣​លាន​ផោន​ទៅ​អតីត​ប្រធាន UEFA​ លោក Michel Platini៕

​អត្ថបទ​៖​នាង សុភា​វុ​ធ