កណ្ដាល៖ នៅថ្ងៃទី៤ខែមិថុនានេះ គ្រប់បណ្តាមណ្ឌលបោះឆ្នោតឃុំសង្កាត់ទាំងអស់នៅទូទាំងខេត្តកណ្តាល បានកំពុងរៀបចំការិយាល័យបោះឆ្នោតទៅតាមប្លង់គណៈកម្មាធិការជាតិរៀបចំការបោះឆ្នោត គ.ជ.ប កំណត់ ដើម្បីត្រៀមទទួលប្រជាពលរដ្ឋទៅបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥ នៅថ្ងៃស្អែកទី៥ ខែមិថុនា ឆ្នាំ២០២២។
បើតាមលោក នៅ អាន ប្រធានគណៈកម្មការរៀបចំការបោះឆ្នោតសង្កាត់តាខ្មៅ ខេត្តកណ្តាល បានថ្លែងប្រាប់BTV នៅថ្ងៃទី៤ ខែមិថុនានេះថា ព្រឹកថ្ងៃនេះ គណៈកម្មការរៀបចំការបោះឆ្នោតសង្កាត់របស់លោក គឺបានប្រគល់កេសឡាំងដាក់សំភារៈ៣២មុខ បំរើអោយការបោះឆ្នោត មានហឹបឆ្នោត និងបន្ទប់សម្ងាត់ជាដើម ជូនទៅដល់បណ្តាការិយាបោះឆ្នោតទំាងអស់ រួចហើយ ដើម្បីយកទៅដំឡើងរៀបចំការិយាល័យត្រៀមទទួលប្រជាពលរដ្ឋចូលទៅបោះឆ្នោតនៅថ្ងៃស្អែកនេះ។
លោក នៅ អាន បន្តថា ដោយឡែកសម្រាប់សន្លឹកឆ្នោត ទឹកខ្មៅលប់លាងមិនជ្រះ និងត្រាសំងាត់ គឺយើងមិនទាន់ប្រគល់ជូនបណ្តាប្រធានការិយាល័យបោះឆ្នោតនោះទេ ពោលគឺត្រូវរង់ចាំប្រគល់ជូននៅព្រឹកថ្ងៃស្អែកនេះ ។
ទោះយ៉ាងណាក៏ដោយ លោក នៅ អាន បានស្នើប្រជាពលរដ្ឋដែលមានឈ្មោះក្នុងបញ្ជីឈ្មោះបោះឆ្នោតទាំងអស់ សូមអញ្ជើញទៅបោះឆ្នោតទាំងអស់គ្នា ហើយដើម្បីទទួលបានការបោះឆ្នោតលឿន លោកក៏បានណែនាំអោយពលរដ្ឋ ត្រូវយកភា្ជប់ជាមួយនៅបណ្ណព័ត៌មានបោះឆ្នោត និងអត្តសញ្ញាណបណ្ណសញ្ជាតិខ្មែរ ហើយសម្រាប់អ្នកគ្មានអត្តសញ្ញាណបណ្ណ ត្រូវយកបណ្ណ ឯកសារបញ្ជាក់អត្តសញ្ញាណបម្រើឲ្យការបោះឆ្នោត ឬបណ្ណ ឯ.អ ដើម្បីទទួលបានសិទ្ធបោះឆ្នោត។
បើតាម លោក ផាន់ រិទ្ធិពល ប្រធានលេខាធិការដ្ឋានគណៈកម្មការរៀបចំការបោះឆ្នោតខេត្តកណ្តាល ថ្លែងថា នៅទូទាំងខេត្តកណ្តាល មានឃុំសង្កាត់ចំនួន១២៧ មានស្ថានីយ៍បោះឆ្នោតចំនួន ៥៦១ ស្ថានីយ៍ និងមានការិយាល័យបោះឆ្នោតចំនួន១៧៤៥ការិយាល័យ និងមានពលរដ្ឋដែលមានឈ្មោះនៅក្នុងបញ្ជីឈ្មោះបោះឆ្នោតចំនួនសរុប ៧៧ម៉ឺន៥៨០៤នាក់៕ អត្ថបទ៖ ស៊ុម សុខជា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
