​បាល់ទាត់៖ ​កំពូល​កីឡាករ​បាល់ទាត់​ទាំងពីរ Cristiano Ronaldo និង Lionel Messi បាន​ស៊ុត​បញ្ចូល​ទី​រៀងខ្លួន​ក្នុងជំនួប​អន្តរជាតិ​ ឱ្យ​ក្រុម​ជំរើសជាតិ​របស់ខ្លួន​នៅ​យប់​ថ្ងៃអាទិត្យ​ម្សិលមិញ​។

​​ខ្សែប្រយុទ្ធ​ក្រុម​បិសាច​ក្រហម Manchester United, Cristiano Ronaldo រកបាន​ ២​គ្រាប់​ម្នាក់ឯង​ក្នុង​ជ័យជំនះ​របស់​ក្រុម​ព័រទុយហ្កាល់​យកឈ្នះ​លើ​ស្វ៊ី​ស ៤-០ នៅ​ក្របខណ្ឌ UEFA Nations League​។ ២​គ្រាប់​បន្ថែមទៀត​នេះ​មាន​ន័យថា Ronaldo បន្ត​ពន្លាត​កំណត់ត្រា​កីឡាករ​ដែល​ស៊ុត​បញ្ចូល​ទី​ច្រើនជាងគេ ​ឱ្យក្រុម​ជំរើសជាតិ​ឡើងដល់ ១១៧គ្រាប់​។ ​​ជ័យជំនះ​នេះ​ធ្វើឱ្យ​ព័រទុយហ្កាល់​ឡើងឈរ​លើ​គេ​ផងដែរ​ក្នុង​ពូ​ល B នៅ​ក្របខណ្ឌ Nations League មាន ៤ពិន្ទុស្មើគ្នា​ជាមួយ​ឆេ​ក​ដែល​ស្មើគ្នា​ជាមួយ​អេ​ស្ប៉ា​ញ​យប់មិញ​។

​​ងាក​មក​ខ្សែប្រយុទ្ធ Paris Saint Germain, Lionel Messi រកបាន​ដល់​ទៅ ៥គ្រាប់​ម្នាក់ឯង​ឱ្យ​អា​ហ្ស​ង់​ទីន​យកឈ្នះ​អេ​ស្តូ​នី ៥-០ ក្នុងជំនួប​មិត្តភាព​អន្តរជាតិ​។ ​​នេះ​ជា​គ្រាប់​បាល់​ទី៨៦ សំរាប់ Messi ឱ្យ​ក្រុម​ជំរើសជាតិ ពោលគឺ​តាម​ពីក្រោយ Ronaldo ៣១គ្រាប់​៕

​អត្ថបទ​៖​នាង សុភា​វុ​ធ