ភ្នំពេញ៖ អ្នកនាំពាក្យគណៈកម្មាធិការជាតិរៀបចំការបោះឆ្នោត(គ.ជ.ប)បានបញ្ជាក់ថា សម្រាប់ការបោះឆ្នោតជ្រើស រើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២នេះ មានសន្លឹក ឆ្នោត មិនបានការជិត២ភាគរយ បើធៀបនឹងសន្លឹកដែលមានក្នុងហិបឆ្នោតទាំងអស់។ 

ឯកឧត្តម សោម សូរីដា អ្នកនាំពាក្យគណៈកម្មាធិការជាតិរៀបចំការបោះឆ្នោតបាន បញ្ជាក់ឲ្យដឹងនៅថ្ងៃទី០៦ ខែមិថុនា ឆ្នាំ២០២២នេះថា ប្រជាពលរដ្ឋដែលបានអញ្ជើញទៅ បោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៥ មានចំនួន៧ ៣៨២ ៤៤៩ នាក់ស្មើ៨០.១៩ភាគរយ នៃចំនួនអ្នកមានឈ្មោះក្នុងបញ្ជីបោះឆ្នោតសរុប ជាង៩លាន ២ សែន នាក់។

ឯកឧត្ដមបានលើកឡើងថា ចំពោះសន្លឹកឆ្នោតបានការមាន ចំនួន ៧ ២៣៦ ២៤៤ សន្លឹក និងសន្លឹកឆ្នោតមិនបានការមានចំនួន ១៤៦ ២០៥ សន្លឹក បើធៀបនឹងចំនួន សន្លឹកដែលមានក្នុងហិបឆ្នោតចំនួន ៧ ៣៨២ ៤៤៩ សន្លឹក គឺស្មើ១.៩ភាគរយ ជាសន្លឹកឆ្នោត មិនបានការសម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥នេះ។ 

សូមជម្រាបថា ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ ២០២២នេះ មានគណបក្សនយោបាយចំនួន១៧ គណបក្សបានចូលរួមប្រកួតប្រជែងក្នុងការបោះឆ្នោត។ សម្រាប់លទ្ធផលបឋមក្រៅផ្លូវការបានបង្ហាញថា គណបក្សប្រជាជនកម្ពុជា បានទទួលសំឡេងគាំទ្រច្រើនជាង គណបក្សនយោបាយផ្សេងៗទៀត៕