​អ៊ុយក្រែន៖ ប្រធាន​ទីភ្នាក់ងារ​ថាមពល​អា​តូ​មិ​ក​អន្តរជាតិ (IAEA) បាន​និយាយ​កាលពី​ថ្ងៃ​ចន្ទ​ថា លោក​កំពុង​ធ្វើកា​រលើ​ការបញ្ជូន​ក្រុម​អ្នកជំនាញ​អន្តរជាតិ​ទៅ​ត្រួតពិនិត្យ​សុវត្ថិភាព ​នៅ​រោងចក្រ​ថាមពលនុយក្លេអ៊ែរ​ដែល​គ្រប់គ្រង​ដោយ​រុស្ស៊ី​នៅ​ទីក្រុង Zaporizhzhia របស់​អ៊ុយ​ក្រែ​ន​។​

​ថ្លែង​នៅ​ទីក្រុង​វី​យែ​ន លោក Rafael Grossi បាន​និយាយថា រដ្ឋាភិបាល​អ៊ុយ​ក្រែ​នបាន​អំពាវនាវ​ដល់​លោក និង​អគ្គលេខាធិការ​អង្គការសហប្រជាជាតិដើម្បី​ស្វែងរក​មធ្យោបាយ​រំដោះ​រោងចក្រ ដែលជា​រោងចក្រ​ថាមពលនុយក្លេអ៊ែរ​ធំ​បំផុត​របស់​ប្រទេស និង​ធំជាងគេ​នៅ​អឺរ៉ុប​ និង​ដើម្បី​អនុវត្តសន្តិសុខ និង​ការពារ​ការងារ​នៅ​ទីតាំង​នោះ​។​ ​លោក Grossi បាន​ថ្លែង​ទៅកាន់​ក្រុមប្រឹក្សាភិបាល​ក្នុង​កិច្ចប្រជុំ​ថា លក្ខខណ្ឌ​ការងារ​នៅទីក្រុង Zaporizhzhia គួរ​ឲ្យ​ព្រួយបារម្ភ​ខ្លាំង ហើយ​និយតករ​អ៊ុយ​ក្រែ​ន​បាន​ជូនដំណឹង​ដល់​យើង​ថា ​ពួកគេបាន​បាត់បង់​ការគ្រប់គ្រង​លើ​សម្ភារៈ​នុយក្លេអ៊ែរ ហើយ​គ្មាន​សកម្មភាព​ការពារ​នោះទេ​។​

​លោក Grossi បាន​និយាយ​ទៅកាន់​គណៈប្រតិភូ​នៅក្នុង​កិច្ចប្រជុំ​ថា យើង​នឹង​ទៅ​ទីក្រុង Zaporizhzhia តាម​ការស្នើសុំ​របស់​ប្រទេស​អ៊ុយ​ក្រែ​ន​។​ ​ប្រធានទីភ្នាក់ងារ​ថាមពល​អា​តូ​មិ​ក​អន្តរជាតិ (IAEA) និយាយថា លោក​កំពុង​បន្ត​ដាក់​សម្ពាធ​លើរដ្ឋាភិបាល​រុស្ស៊ី សម្រាប់​ដំណើរ​ការចូល​ទៅកាន់​រោងចក្រ​នេះ​ ដែល​ត្រូវបាន​បំផ្លាញ​ដោយ​ការប្រយុទ្ធគ្នានៅក្បែរនោះ​កាលពីដើម​ខែមីនា៕

អត្ថបទ៖ ប៊ុនថន