​អ៊ុយក្រែន៖ ប្រធានាធិបតី​អ៊ុយ​ក្រែ​ន​បាន​ព្រមាន​កាលពី​ថ្ងៃ​ចន្ទ​ថា ទាហាន​រុស្ស៊ី​មាន​គោលបំណង​ដណ្តើម​យក​ទីក្រុង Zaporizhzhia នៅ​ភាគ​អាគ្នេយ៍​របស់​ប្រទេស ​ដែល​នឹង​អាច​ឱ្យ​ពួកគេ​រុលចូល​ទៅកាន់​តែ​ជិតកណ្តាល​ប្រទេស​អ៊ុយ​ក្រែ​ន​។​

​លោក Volodymyr Zelenskyy បាន​និយាយថា កិច្ចចរចា​សន្តិ​ភាពជា​មួយ​រុស្ស៊ី​ឈរ​នៅ​ក្នុង​កម្រិត​សូន្យ​។ ស្ថានភាព​កំពុង​គំរាមកំហែង​បំផុត​បាន​វិវឌ្ឍន៍​នៅក្នុង​ទីក្រុង Zaporizhzhia ដែល​ផ្នែក​ខ្លះ​ត្រូវ​រុស្ស៊ី​ដណ្តើម​យក​បាន​រួចហើយ​។ លោក Zelenskyy និយាយ​ថា ​សត្រូវ​មានបំណង​ដណ្តើម​កាន់កាប់ទីក្រុង Zaporizhzhia​។​ នៅ​ភាគខាងត្បូង​ប្រទេស​អ៊ុយ​ក្រែ​ន រុស្ស៊ី​បាន​ដណ្តើម​យក​ទីក្រុង​ធំៗ​របស់​អ៊ុយ​ក្រែ​ន​រួចហើយ​មាន​ទីក្រុង Kherson និង Mariupol​។ ទីក្រុង Zaporizhzhia មាន​ប្រជាជន​ចំនួន 1.6លាន​នាក់​គឺជា​មជ្ឈមណ្ឌល​ឧស្សាហកម្ម​ធំ​បំផុត​មួយ ​នៅ​ភាគ​អាគ្នេយ៍​ប្រទេស​អ៊ុយ​ក្រែ​ន​។ ​លោក Zelenskyy និយាយ​ថា កងទ័ព​អ៊ុយ​ក្រែ​ន​កំពុងតែ​ប្រយុទ្ធ​នៅ​តំបន់​ភាគ​ខាងកើត​ប្រទេស ដែល​គេ​ស្គាល់​ថា Donbas។​

ក្នុងពេល​ជាមួយគ្នានេះ​ទីក្រុង Kyiv សង្ឃឹម​ថា​នឹង​បង្កើត​ច្រក​របៀង​សុវត្ថិភាព ដែល​នឹង​អនុញ្ញាត​ឱ្យ​នាវា​របស់​ខ្លួន​នាំចេញ​គ្រាប់​ធញ្ញជាតិ ​ដែល​ត្រូវ​បាន​រារាំង​នៅ​ខាងក្នុង​ប្រទេស​ដោយ​ការ​ប្រយុទ្ធ​គ្នា​។ លោក Zelenskyy និយាយ​ថា ​អ៊ុយ​ក្រែ​ន​កំពុង​ពិភាក្សា​ជាមួយ​ប្រទេស​ដូចជា​ទួរគី និង​ចក្រភព​អង់គ្លេស​អំពី​ការ​ធានា​បាន​សន្តិសុខ សម្រាប់​នាវា​អ៊ុយ​ក្រែ​ន​ផ្ទុក​គ្រាប់​ធញ្ញជាតិ​ដែល​ត្រូវការ​ច្រើន​សម្រាប់​ការនាំចេញ​។ ការ​វាយ​លុក​របស់​រុស្ស៊ី​លើ​អ៊ុយ​ក្រែ​ន​បាន​បង្អាក់​ការ​ផ្គត់ផ្គង់​ស្បៀង​អាហារ សម្រាប់​ប្រទេស​ជាច្រើន​ក្នុង​ពិភពលោក​បណ្តាល​ឱ្យ​តម្លៃ​កើន​ឡើង៕

អត្ថបទ៖ ប៊ុនថន