អ៊ុយក្រែន៖ សាកសពទាហានអ៊ុយក្រែនយ៉ាងតិច ២១០នាក់ដែលការពារទីក្រុង Mariupol ភាគខាងត្បូងត្រូវបានរុស្ស៊ីប្រគល់ឲ្យអាជ្ញាធរអ៊ុយក្រែនវិញ។ នៅក្នុងសេចក្តីថ្លែងការណ៍វីដេអូដែលបានចេញផ្សាយកាលពីថ្ងៃអង្គារ ទីភ្នាក់ងារស៊ើបការណ៍សម្ងាត់ការពារជាតិរបស់ប្រទេសបាននិយាយថា ទាហានដែលស្លាប់ភាគច្រើនគឺជាអ្នកការពាររោងចក្រដែកថែប Azovstal។
ប្រទេសអ៊ុយក្រែនកាលពីថ្ងៃចុងសប្តាហ៍បានប្រកាសជាផ្លូវការ នូវការដោះដូរយោធាដែលបានស្លាប់លើកដំបូងចាប់តាំងពីសង្គ្រាមបានចាប់ផ្តើម។ អ៊ុយក្រែននិយាយថា ភាគីទាំងពីរបានដោះដូរសាកសពចំនួន ៣២០នាក់សរុបដោយភាគីម្ខាងៗទទួលបានសាកសពមកវិញចំនួន ១៦០នាក់។ ការដោះដូរនេះបានធ្វើឡើងនៅជួរមុខក្នុងទីក្រុង Zaporizhzhia។ ការធ្វើកោសល្យវិច័យលើសាកសពអ្នកប្រយុទ្ធអ៊ុយក្រែនមួយចំនួន ដែលបានស្លាប់នៅរោងចក្រដែកថែប Azovstal ត្រូវធ្វើនៅទីក្រុង Kyiv។ ទីតាំងចុងក្រោយរបស់អ្នកប្រយុទ្ធនៅរោងចក្រដែកថែប ដែលជាបន្ទាយលាក់ខ្លួននៅក្នុងទីក្រុងដែលត្រូវបានបំផ្លាញ បានក្លាយជានិមិត្តរូបនៃការតស៊ូប្រឆាំងការវាយលុករបស់ទីក្រុងមូស្គូ ប៉ុន្តែវាមិនច្បាស់នោះទេថា តើមានសាកសពប៉ុន្មាននាក់អាចនៅសល់នៅក្នុងរោងចក្រនេះ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
