បាល់ទះ៖ សមាជិកក្រុមបាល់ទះជម្រើសជាតិកម្ពុជា ៦រូបត្រូវបានក្លិបបរទេសយ៉ាងហោច ៤ប្រទេសធ្វើការស្នើសុំសហព័ន្ធដើម្បីចង់នាំយកពួកគេទៅរួមក្លិបរបស់ខ្លួន បន្ទាប់ពីពួកគេបានបង្ហាញសមត្ថភាពយ៉ាងល្អ និងបានរួមចំណែកជួយក្រុមបំបែកកំណត់ត្រាប្រវត្តិសាស្ដ្រឈ្នះមេដាយសំរឹទ្ធ ក្នុងព្រឹត្តិការណ៍ស៊ីហ្គេមនៅប្រទេសវៀតណាមកាលពីថ្មីៗ។ នេះបើតាមការបង្ហើបរបស់លោកបណ្ឌិត អាំង សិរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជា។
លោកបានបង្ហើបថា ក្នុងចំណោមកីឡាករជម្រើសជាតិ ៦រូបមានក្លិបនៅឥណ្ឌូនេស៊ី ម៉ាឡេស៊ី ថៃ និងវៀតណាមបានចែចូវ តែសហព័ន្ធបានអនុញ្ញាតឲ្យកីឡាករម្នាក់ប៉ុណ្ណោះចេញទៅលេងគឺកីឡាករ វឿន វាសនា ដែលឈានដល់កិច្ចព្រមព្រៀងលេងឲ្យក្លិបមួយនៅវៀតណាម ជាមួយតម្លៃខ្លួនខ្ទង់ម៉ឺនដុល្លារសម្រាប់ការលេងរយៈពេល ២សប្ដាហ៍។ រីឯ ៥រូបទៀតដោយសារមានការស្នើសុំទិញរយៈពេលវែង សហព័ន្ធមិនបានអនុញ្ញាតនោះទេដោយសារខ្លាចប៉ះពាល់ដល់ការប្រមូលផ្ដុំត្រៀមស៊ីហ្គេមឆ្នាំ២០២៣ នៅកម្ពុជា។ សូមរំលឹកថា ក្រុមបាល់ទះបុរសក្នុងសាលជម្រើសជាតិកម្ពុជា បានសាងភាពភ្ញាក់ផ្អើល ក្រោយបានយកឈ្នះអតីតក្រុមមេដាយប្រាក់ស៊ីហ្គេមហ្វីលីពីន ក៏ដូចជាក្រុមខ្លាំងថៃជាមួយការធ្វើបានយ៉ាងល្អក្នុងការប្រកួតកីឡាស៊ីហ្គេមលើកទី៣១ នៅប្រទេសវៀតណាមកាលពីថ្មីៗ រហូតបំបែកកំណត់ត្រាដណ្ដើមបានមេដាយសំរឹទ្ធលើកដំបូង។ តាមរយៈនេះបានធ្វើឲ្យអ្នកសេ្នហាវិស័យកីឡាបាល់ទះក្នុងប្រទេស និងតំបន់ មានការចាប់អារម្មណ៍ជាខ្លាំងចំពោះក្រុមបាល់ទះកម្ពុជា។
តាមរយៈនេះហើយទើបមានបណ្ដាក្លិបជាច្រើន បានតាមចែចូវកីឡាករបាល់ទះជម្រើសជាតិកម្ពុជា។ តែដោយសារមានការស្នើសុំរយៈពេលវែងទើបសហព័ន្ធមិនទាន់បើកភ្លើងខៀវ តែក្រោយចប់យុទ្ធនាការស៊ីហ្គេមឆ្នាំ២០២៣ សហព័ន្ធអាចនឹងបើកផ្លូវឲ្យកីឡាករជាច្រើនចេញទៅប្រកបអាជីពនៅក្រៅប្រទេស ជាមួយការធានានូវលិខិតគតិយុត្តិផ្សេងៗដើម្បីធានាបាននូវការគាំពា និងអត្ថប្រយោជន៍សម្រាប់កីឡាករទៀតផង។ នេះបើតាមការបង្ហើបបន្ថែមរបស់លោកបណ្ឌិត អាំង សិរីពិសិដ្ឋ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
