ភ្នំពេញ៖ ដើម្បីទប់ស្កាត់ការវាយការលុកពីជំងឺកូវីដ-១៩ មនុស្សវ័យចាស់ រស់នៅរាជធានីភ្នំពេញ នាថ្ងៃទី ១១ខែមិថុនានេះ សម្រុកទៅចាក់វ៉ាក់សាំងដូសទី៥ តាមការកំណត់របស់គ្រូពេទ្យ។

មនុស្សវ័យចាស់រស់នៅរាជធានីភ្នំពេញ មកចាក់វ៉ាក់សាំងក្នុងមន្ទីរពេទ្យបង្អែកច្បារអំពៅ ខណ្ឌច្បារអំពៅ រាជធានីភ្នំពេញ នៅថ្ងៃទី១១ខែមិថុនានេះ បានប្រាប់BTVឱ្យដឹងថា បន្ទាប់ពី​ចាក់វ៉ាក់សាំង​ដូសទី៥រួច សុខភាពធម្មតា ​មិនបង្ករផលបះពាល់ដល់សុខភាពនោះទេ។ ការចាក់វ៉ាក់សាំងពិតជាមានសារៈសំខាន់​ ព្រោះអាចទប់ទល់នឹងការវាយលុកពីជំងឺកូវីដ និង​មិនចង់ឲ្យប្រទេសកម្ពុជា​មានការរីករាលដាលជំងឺកូវីដដូចកាលឆ្នាំមុនពិបាករស់នៅណាស់។ លើសពីនេះ ពួកគាត់​បានអំពាវដល់ពលរដ្ឋសូមបន្តទៅទទួលការ​ចាក់​វ៉ាក់សាំងតាមវេនដែល​បាន​កំណត់ និងអគុណដល់រាជរដ្ឋាភិបាល ដែលស្វះស្វែងរកវ៉ាក់សាំងចាក់ជូនពលរដ្ឋដោយមិនគិតថ្លៃ។

យុទ្ធនាការចាក់វ៉ាក់សាំងបង្ការជំងឺកូវីដ-១៩ ដូសទី៥ ​ជូនមន្រ្តីជួរមុខ ​និងក្រុមគោលដៅអាទិភាព ចាប់​ដំណើរការពីថ្ងៃទី០៩ ខែមិថុនាតទៅ ស្ថិតនៅតាំងសុខាភិបាលសាធារណៈ និងទីតាំងផ្សេងៗ​មួយចំនួនទៀត​ក្នុងសហគមន៍ ដែលការសម្របសម្រួលពីអាជ្ញាធរមូលដ្ឋាន។

បច្ចុប្បន្នប្រទេសកម្ពុជា បើកដំណើរការសេដ្ឋកិច្ចធម្មតា ជាមួយវត្តមានជំងឺកូវីដ-១៩​ ក្រោយពេល រាជ​រដ្ឋាភិបាលទទួល​បានជោគជ័យ​លើនយោបាយចាក់វ៉ាក់សាំងកូវីដ ស្រោចលើប្រជាពលរដ្ឋ​ចាប់​ពីដូស​មូលដ្ឋាន​រហូតដល់ដូសជំរុញ ​បានជាច្រើនលាននាក់៕

អត្ថបទ៖ទូច សោភ័ណ