កំពត៖ ឯកឧត្តម ហ៊ុន ម៉ានី បានលើកឡើងថា សង្គមជាតិមួយមានការអភិវឌ្ឍអាស្រ័យលើកត្តាសំខាន់បួន គឺវិស័យការពារជាតិ សន្តិសុខជាតិ ការបរទេស និងម៉ាក្រូសេដ្ឋកិច្ច ប៉ុន្តែដើម្បីឲ្យវិស័យទាំ៤នេះ អាចប្រព្រឹត្តទៅបានដោយជោគជ័យ គេត្រូវការធនធានមនុស្សប្រកបដោយសមត្ថភាព និងប្រសិទ្ធភាពជាចាំបាច់។

ថ្លែងក្នុងពិធីជួបសំណេះសំណាលជាមួយគណៈគ្រប់គ្រង សាស្ត្រាចារ្យ និងគរុសិស្សនៃសាលាគរុកោសល្យ និងវិក្រិតការខេត្តកំពត នាព្រឹកថ្ងៃទី១១ ខែមិថុនា ឆ្នាំ២០២២ ឯកឧត្តម ហ៊ុន ម៉ានី ប្រធានគណៈកម្មការទី៧ នៃរដ្ឋសភា (អប់រំ យុវជន កីឡា ធម្មការ កិច្ចការ​សាសនា វប្បធម៌ និងទេសចរណ៍) ​បានលើកឡើងថា ​ប្រមុខរាជរដ្ឋាភិបាលកម្ពុជា បានកំណត់​វិស័យ​អាទិភាពជាច្រើនក្នុងដំណើរការអភិវឌ្ឍប្រទេសជាតិ ហើយវិស័យអប់រំ គឺជាឤទិភាព​មួយ​ក្នុង​ចំណោម​ឤទិភាពនានា ​សម្រាប់ការរីកចម្រើនរបស់សង្គមជាតិ ​គ្រប់កាលៈទេសៈ ចាប់តាំង​ពីការ​រំដោះចេញ​ពីរបបប្រល័យពូជសាសន៍ រហូតដល់ដំណាក់កាលចុងក្រោយ​នៃការរីករាលដាល​នៃ​ជំងឺកូវីដ-១៩ និងបន្តទៅថ្ងៃអនាគត។

ឯកឧត្តម បានបន្តទៀតថា ភាពជោគជ័យ លើការងារអ្វីក៏ដោយ ត្រូវកើតឡើងពីការតាំងចិត្ត ប្រឹងប្រែង​ដោយខ្លួនឯង ព្រោះគ្មានបុគ្គលណា ​អាចដឹកដៃយើងទៅរកភាពជោគនោះទេ កម្ពុជា​ក៏ដូចគ្នា ​មានតែសមត្ថភាពនៃការដឹកនាំតែមួយគត់ ដែលអាចធ្វើឲ្យប្រទេសអភិវឌ្ឍន៍​រីកចម្រើន​លើគ្រប់វិស័យ ក្នុងនោះ ភាពជោគជ័យក៏ត្រូវមានការចូលរួមពីប្រជាពលរដ្ឋទាំងអស់ ដែលលោក​មាន​ការអប់រំល្អ អាចវិភាគ ​ជ្រើសរើសមេដឹកនាំបានត្រឹមត្រូវ។

ឯកឧត្តម ស្នើដល់លោកគ្រូ អ្នកគ្រូ ​និស្សិត​បញ្ញវន្ត​ យុវជនទាំងអស់ ​សូមពិចារណា៣ចំណុច ដើម្បីរួមគ្នា​ការពារសមទ្ធិផល ​និងអភិវឌ្ឍន៍​ខ្លួនឯង និងប្រទេសបន្តទៀត ៕ អត្ថបទ៖ អន សារឹម