ភ្នំពេញ៖ លោកជំទាវ វេជ្ជបណ្ឌិត យក់ សម្បតិ្ត រដ្ឋលេខាធិការក្រសួងសុខាភិបាល និងជានាយកគម្រោងអាហារូបត្ថម្ភនៅកម្ពុជា បានប្រគល់សម្ភារៈអប់រំ និងការិយាល័យ ដល់ខេត្តគោលដៅទាំង៧ និងអង្គភាពអនុវត្តន៍គម្រោង របស់គម្រោងអាហារូបត្ថម្ភនៅកម្ពុជា នាព្រឹកថ្ងៃទី១៣ ខែមិថុនា ឆ្នាំ២០២២នេះ។

ខេត្តគោលដៅទាំង៧ រួមមាន៖ ខេត្តរតនគិរី មណ្ឌលគិរី ស្ទឹងត្រែង ក្រចេះ ព្រះវិហារ កោះកុង និងកំពង់ឆ្នាំង។

ក្នុងនោះអង្គភាពអនុវត្តគម្រោង រួមមាន៖ DLID កម្មវិធីជាតិអាហារូបត្ថម្ភ នៃមជ្ឈមណ្ឌលជាតិ​គាំពារ​មាតា និងទារក, DLIG មជ្ឈមណ្ឌលជាតិលើកកម្ពស់សុខភាព, DLIH (PCA) ភ្នាក់ងារបញ្ជាក់​ចំណាយ​ក្រសួងសុខាភិបាល, DLIJ​ នាយកដ្ឋានផែនការថវិកា ​នៃក្រសួងសុខាភិបាល និងDLIE នាយកដ្ឋានការពារសុខភាព ​នៃក្រសួងសុខាភិបាល។

ក្នុងពិធីប្រគល់សម្ភារៈខាងលើនេះ លោកជំទាវវេជ្ជបណ្ឌិត យក់ សម្បតិ្ត បានថ្លែងអំណរគុណដល់​មន្រី្ត​សុខាភិបាលទាំងអស់ ដែលបានខិតខំប្រឹងប្រែងទប់ស្កាត់ជំងឺកូវីដ-១៩ និងការផ្តល់វ៉ាក់សាំង​បង្ការ​ជំងឺកូវីដ-១៩ រហូតទទួលបានជោគជ័យ​ និងឈានដល់ការបើកដំណើរការប្រទេសឡើងវិញ ត្រឡប់ទៅរកប្រក្រតីភាពថ្មីឡើងវិញ។

ជាពិសេសស្ថិតក្រោមការគ្រប់គ្រងរបស់ក្រសួងសុខាភិបាល ក៏ដូចជាក្រុមប្រឹក្សាជាតិ​គាំទ្រ​អាហារូបត្ថម្ភ​នៅកម្ពុជា​ យើងនិងបន្តសហការគ្នាជាមួយ និងអាជ្ញាធរមូលដ្ឋាន គណៈកម្មការ ជនស្ម័គ្រចិត្ត​នៅតាមមូលដ្ឋានក្រោមការចង្អុលបង្ហាញពីឯកឧត្តម​ អភិបាលខេត្ត ជាពិសេស​គឺក្រសួង​សុខាភិបាលផ្ទាល់។ ដូច្នេះលោកជំទាវវេជ្ជបណ្ឌិត យក់ សម្បតិ្ត សង្ឃឹម និងជឿជាក់ថា ​នឹងបន្តការងារនេះតទៅទៀត។

ជាក់ស្តែងនាថ្ងៃនេះ តាមរយៈគម្រោងអាហារូបត្ថម្ភនៅកម្ពុជា ក្រសួងសុខាភិបាល បានធ្វើការបញ្ជា​ទិញនូវសម្ភារៈមួយចំនួនក្រោមមជ្ឈមណ្ឌលជាតិគាំពារមាតា ​និងទារក ​ដែលជាសហការីផ្ទាល់ ក្នុងការគ្រប់គ្រងកម្មវីធីនេះ ហើយយើងក៏បានផ្តល់ជូននូវសម្ភារៈមួយចំនួនផងដែរ។

ជាចុងក្រោយលោកជំទាវ វេជ្ជបណ្ឌិត យក់ សម្បតិ្ត បានបញ្ជាក់ទៀតថា កម្មវិធីគាំពារមាតា ​និងទារក គឺជាកម្មវិធីអាទិភាពចម្បងបំផុតសម្រាប់​ គោលនយោបាយ​ និងយុទ្ធសាស្រ្តសុខាភិបាលជាតិ ក្នុងមុំមួយ​នៃយុទ្ធសាស្រ្តចតុកោណរបស់រាជរដ្ឋាភិបាល។

ឆ្លៀតក្នុងឱកាសនោះលោកជំទាវ វេជ្ជបណ្ឌិត យក់ សម្បតិ្ត ក៏សូមគោរពថ្លែងអំណរគុណនូវ​ភាព​ដឹកនាំ​ដ៏ឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្តនៃ​ព្រះរាជា​ណា​ចក្រកម្ពុជា ដែលសម្តេចតែងតែយកចិត្តទុកដាក់ដល់មន្រី្តសុខាភិបាល ​ព្រមទាំងប្រសិទ្ធនាមគ្រូពេទ្យ គឺជា«កងទ័ពអាវ ស ជួរមុខក្នុងការប្រយុទ្ធប្រឆាំងនឹងជំងឺកូវីដ-១៩» ជាមួយនឹងការប្រយុទ្ធ​ប្រឆាំង​នឹងជំងឺកូវីដ-១៩នេះ គ្រូពេទ្យរបស់យើងក៏មិនភ្លេច​នូវការផ្តល់សេវាសុខាភិបាល​មូលដ្ឋាន​ដល់​ការ​គាំពារ​សុខភាពមាតា​ និងទារកប្រកបដោយ​សុវត្ថិភាព៕អត្ថបទ រដ្ឋា