ភ្នំពេញ៖ សកលវិទ្យាល័យ តូហូគូ (Tohoku University) នៃប្រទេសជប៉ុន បានបន្តជួយអភិវឌ្ឍន៍បច្ចេកវិទ្យាម៉ាស៊ីនរាវមីន មានឈ្មោះថា ALIS គាំទ្រដល់មជ្ឈមណ្ឌលសកម្មភាពកំចាត់មីនកម្ពុជា (CMAC) ក្នុងការងារបោសសំអាតមីន និងគ្រាប់យុទ្ធភ័ណ្ឌមិនទាន់ផ្ទុះ ឲ្យកាន់តែល្អប្រសើរ និងមានភាពងាយស្រួលជាងមុន ។

ក្នុងពិធីចុះអនុស្សារណៈយោគយល់គ្នា (MOU) ជាមួយលោក Motoyaki Sato សាស្ត្រាចារ្យសកលវិទ្យាល័យតូហូគូ ស្តីពីការសិក្សាវាយតម្លៃកិច្ចប្រតិបត្តិការម៉ាស៊ីនរាវមីន ALIS សម្រាប់រាវរក និងស្តេនគ្រាប់មីននៅចម្ការមីន នៅថ្ងៃទី១៣ ខែមិថុនា ឆ្នាំ២០២២ ឯកឧត្តម ហេង រតនា អគ្គនាយកស៊ីម៉ាក់ មានប្រសាសន៍ថា នៅក្នុងឆ្នាំ២០០៦ ម៉ាស៊ីនរាវមីន ALIS បានចូលរួមក្នុងការងារស្រាវជ្រាវ និងអភិវឌ្ឍបច្ចេកវិទ្យា ក្នុងសកម្មភាពមនុស្សធម៌បោសសម្អាតមីន ដែលក្នុងដំណាក់កាលលើកតំបូងនោះ ម៉ាស៊ីនរាវមីនប្រភេទនេះ ត្រូវបានប្រតិបត្តិការរាវរក និងស្កេនវត្ថុសង្ស័យដោយអ្នកបញ្ជាមានចំនួន២នាក់ គឺម្នាក់នៅពិនិត្យមើលអេក្រង់ (Monitor system) និងម្នាក់ទៀតកាន់ម៉ាស៊ីនរាវ និងស្កេន ។

ឯកឧត្តម បានបន្តថា រយៈពេល៤ឆ្នាំបន្ទាប់ ក្នុងឆ្នាំ២០១០ ម៉ាស៊ីនរាវមីន ALIS បានវិវឌ្ឍរូបរាងជាម៉ាស៊ីនរាវមីន និងស្កេន ដែលប្រើដោយមនុស្សតែម្នាក់ និងមានទម្ងន់ ៧គីឡូក្រាម អ្នកប្រើត្រូវស្ពាយប្រអប់អេឡិចត្រូនិកជាប់នឹងខ្នង និងដៃកាន់ម៉ាស៊ីនរាវ និងស្កេន ហើយកិច្ចប្រតិបត្តិការ ALIS មានភាពយឺតយ៉ាវដោយប្រព័ន្ធអេឡិចត្រូនិកដំណើរការយឺត ។ 

ឯកឧត្តម ហេង រតនា បានបន្ថែមថា ក្នុងឆ្នាំ២០១៣ ម៉ាស៊ីនរាវមីន ALIS ប្រតិបត្តិការមានភាពលឿនជាងមុនបន្តិច ដោយប្រព័ន្ធអេឡិចត្រូនិកមានការអភិវឌ្ឍន៍ តែមានបញ្ហាក្នុងការស្កេន បើមានស្រមោលធ្វើចលនានៅលើដី ឬទីកន្លែងដែលត្រូវស្កេននោះ Ground penetration radar (GPR) ស្កេនមិនបានលទ្ធផលល្អ ឬបញ្ជាក់ថាមានកំហុស ។

អគ្គនាយកស៊ីម៉ាក់ បានបញ្ជាក់ថា នៅក្នុងឆ្នាំ២០១៩ ម៉ាស៊ីនរាវមីន ALIS បានអភិវឌ្ឍបច្ចេកវិទ្យា GPR ក្នុងការសិក្សាទិន្នន័យស្កេនបានលឿន និងមានភាពសុក្រិត្យជាងមុន រួមជាមួយនឹងទម្ងន់ស្រាលជាងមុន គឺមានទម្ងន់ត្រឹមតែ ៣.១គីឡូក្រាមប៉ុណ្ណោះ និងប្រើថ្មទំហំD ចំនួន២គ្រាប់ ហើយនៅក្នុងឆ្នាំ២០២២ អង្គភាពស៊ីម៉ាក់នឹងប្រើម៉ាស៊ីនរាវ ALIS ចំនួន ៦ដើម ៕ អត្ថបទ ៖ បាន សុខរិទ្ធិ