ភ្នំពេញ៖ ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ និងលោកជំទាវ Kathryn Campbell រដ្ឋលេខាធិការនៃក្រសួងការបរទេស និងពាណិជ្ជកម្មអូស្ត្រាលី បានសម្តែងការពេញចិត្តចំពោះមិត្តភាពដ៏ យូរលង់ និងកិច្ចសហប្រតិបត្តិការដ៏ល្អក្នុងអំឡុងពេល ៧០ឆ្នាំកន្លងមកនេះ ចាប់តាំងពីការបង្កើតទំនាក់ទំនងការទូតរវាង ប្រទេសទាំងពីរ ថែមទាំងបានឯកភាពប្តេជ្ញាចិត្តបន្តមិត្តភាព និងកិច្ចសហប្រតិបត្តិការដ៏ល្អនេះ។

នៅក្នុងជំនួបការងារកាលពីថ្ងៃទី១៣ មិថុនា ឆ្នាំ២០២០កន្លងទៅ នៅទីស្តីក្រសួង ឯកឧត្តម ប្រាក់ សុខុន បានលើកឡើងសាជាថ្មីនូវការវាយតម្លៃរបស់កម្ពុជា ចំពោះការគាំទ្រ និងជំនួយរបស់អូស្ត្រាលី​ដល់ដំណើរការសន្តិភាព និងការអភិវឌ្ឍនៅកម្ពុជា ជាពិសេសនៅលើវិស័យអប់រំ សុខាភិបាល ការផ្លាស់ប្តូរ រវាងប្រជាជននិងប្រជាជន ការពារជាតិនិងសន្តិសុខ ​និងបានកត់សម្គាល់ អំពីលទ្ធផល ប្រកបដោយផ្លែផ្កានៃកិច្ចពិគ្រោះយោបល់ឧត្តមមន្ត្រីលើកទី៣ នៅទីក្រុងកង់បេរ៉ា។

ជាមួយគ្នានេះ​ ឯកឧត្តម បានចែករំលែកជាមួយលោកជំទាវអំពីការវិវត្តនៃសភាពការណ៍ នៅ​មីយ៉ាន់ម៉ា ដោយគូសបញ្ជាក់ពីភាពស្មុគស្មាញនៃវិបត្តិ ​និងការប្រឈមមុខនានា ក្នុងការស្វែងរក​ដំណោះស្រាយ​សមស្របមួយ​ ដែលតម្រូវឱ្យមានការយោគយល់គ្នា ​ភាពអត់ធ្មត់ និង​ការ​អត់ឱន​ពី​គ្រប់ភាគីពាក់ព័ន្ធទាំងអស់​ ក៏ដូចជាកិច្ចខិតខំប្រឹងប្រែង រួមឯកភាពនិងសាមគ្គីភាពក្នុងចំណោមរដ្ឋ​ជា​សមាជិកអាស៊ាន ​និងគ្រប់ភាគីទាំងអស់។

ឯកឧត្តម បានគូសបញ្ជាក់អំពីវឌ្ឍនភាព ក្នុងការអនុវត្តការព្រមព្រៀងជាឯកច្ឆ័ន្ទ ៥ចំណុច របស់​អាស៊ាន​ស្ដីពីមីយ៉ាន់ម៉ា រួមទាំង​កិច្ច​ខិតខំ​ប្រឹងប្រែង​របស់​លោកជំទាវ​ ក្នុងការរៀបចំការងារជា​មូលដ្ឋាន​ក្នុងអំឡុង​ពេលនៃទស្សនកិច្ចលើកទីមួយរបស់លោក​ទៅកាន់មីយ៉ាន់ម៉ា កាលពីខែ​មីនា​កន្លងទៅ ​សម្រាប់អាទិភាពបន្ទាន់ចំនួន៣រួមមាន៖១.ការបញ្ឈប់ អំពើហិង្សា ២.ការធានា ឱ្យបាន​នូវការផ្តល់​ជំនួយ​មនុស្សធម៌​ទាន់​ពេលវេលាដោយគ្មានការរើសអើង និង៣.ការកសាង​បរិយាកាស​អំណោយ​ផលសម្រាប់ កិច្ច​សន្ទនា​នយោបាយ​ប្រកបដោយបរិយាប័ន្នដើម្បី​ដោះស្រាយ​វិបត្តិនៅ​មីយ៉ាន់ម៉ា។

ឯកឧត្តម បានជម្រាបជូនភ្ញៀវ អំពី ការរៀបចំដំណើរទស្សនកិច្ចជាលើកទី២ របស់ឯកឧត្តមទៅកាន់​មីយ៉ាន់ម៉ា ​ដែលគ្រោងធ្វើនៅចុងខែនេះ ​ដោយសង្កត់ធ្ងន់ថា​ ការជួបពិភាក្សាជាមួយគ្រប់ភាគីពាក់ព័ន្ធ គឺស្ថិតក្នុងចំណោមការផ្ដោតការយកចិត្តទុកដាក់របស់លោកនាពេលនោះ​ ស្របតាម អាណត្តិរបស់​ប្រេសិតពិសេស។

ជាកិច្ចឆ្លើយតប ​ភាគីអូស្រ្តាលី បានកោតសរសើរចំពោះកិច្ចខិតខំប្រឹងប្រែងរបស់​សម្តេចតេជោ​នាយករដ្ឋមន្ត្រី ហ៊ុន សែន​ និងឯកឧត្តមឧបនាយករដ្ឋមន្ត្រី ក្នុងការស្វែងរកដំណោះស្រាយចំពោះ​វិបត្តិ​បច្ចុប្បន្ន​នៅមីយ៉ាន់ម៉ា ​និងបាន អះអាងអំពីការគាំទ្រ​ របស់អូស្ត្រាលីសម្រាប់ការធ្វើជាប្រធាន​អាស៊ាន​របស់កម្ពុជា៕អត្ថបទ៖ ឈិត បូរ៉ាវី