អាមេរិក៖ កាលពីថ្ងៃព្រហស្បតិ៍ម្សិលមិញ លោកប្រធានាធិបតី ចូ បៃដិន បាននិយាយថា សហរដ្ឋអាមេរិកនឹងឆ្លើយតបឲ្យបានស័ក្ដិសមបំផុត បើសិនជាកូរ៉េខាងជើងបង្កើនការបាញ់សាកល្បងមីស៊ីលរបស់ខ្លួន។ អំឡុងសន្និសីទសារព័ត៌មានជាលើកដំបូងនៅសេតវិមាន លោក បៃដិន បាននិយាយថា ពួកយើងកំពុងពិគ្រោះយោបល់ជាមួយប្រទេសជាដៃគូ និងសម្ព័ន្ធមិត្តរបស់ពួកយើង។
លោកបន្តថា នឹងមានការឆ្លើយតប បើសិនជាពួកគេជ្រើសរើសផ្លូវបង្កើនសកម្មភាពអរិភាព។ ពួកយើងនឹងឆ្លើយតបឲ្យបានស័ក្ដិសមបំផុត។ លោក បៃដិន បាននិយាយប្រាប់ក្រុមអ្នកសារព័ត៌មានថា លោកបានត្រៀមខ្លួនរួចរាល់ ដំណោះស្រាយការទូតជាមួយកូរ៉េខាងជើង ប៉ុន្តែមានលក្ខខណ្ឌមួយ គឺពួកគេត្រូវតែរំសាយអាវុធនុយក្លេអ៊ែរជាមុន។ គួរឲ្យដឹងថា កូរ៉េខាងជើងបានបាញ់មីស៊ីលបាលីស្ទិក ២គ្រាប់ចូលទៅក្នុងសមុទ្រកាលពីថ្ងៃព្រហស្បតិ៍ ដែលជាទង្វើអរិភាពលើកដំបូងរបស់ពួកគេ ក្រោមរដ្ឋបាលថ្មីរបស់លោក បៃដិន។
គួរឲ្យដឹងថា ទីក្រុងព្យុងយ៉ាងត្រូវបានហាមប្រាម ពីការអភិវឌ្ឍន៍មីស៊ីលបាលីស្ទិក ក្រោមសេចក្តីសម្រេចរបស់ក្រុមប្រឹក្សាអង្គការសហប្រជាជាតិ (UN) ហើយពួកគេរងទណ្ឌកម្មអន្តរជាតិជាច្រើន ពាក់ព័ន្ធនឹងកម្មវិធីអាវុធរបស់ពួកគេ។ លោក បៃដិន បាននិយាយថា កូរ៉េខាងជើងបានបំពានលើសេចក្តីសម្រេច UN ជាមួយនឹងការបាញ់សាកល្បងមីស៊ីលទាំងអស់នេះ៕
អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
