ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រី បានថ្លែងថា ដំណើរមកដល់ នៃពានរង្វាន់បាល់ទាត់ពិភពលោក (FIFA WORLD CUP) បានបង្ហាញទៅកាន់ពិភពលោកពីសក្ដានុពល ការអភិវឌ្ឍ និងការរស់នៅរបស់ពលរដ្ឋប្រកបដោយភាពសុខសាន្ត ។

ក្នុងឱកាសអញ្ជើញជាអធិបតី ក្នុងព្រឹត្តិការណ៍ដំណើរទេសចរណ៍ ពានរង្វាន់បាល់ទាត់ពិភពលោក នៅថ្ងៃទី១៥ ខែមិថុនា ឆ្នាំ២០២២ ​សម្ដេចតេជោនាយករដ្ឋមន្ត្រី ​មានប្រសាសន៍ថា​ បច្ចុប្បន្ន​បាល់ទាត់ គឺជាប្រភេទកីឡា ដែលមានប្រជាប្រិយភាព និងពេញនិយមបំផុតនៅលើពិភពលោក ដលមាន​មនុស្សប្រុសស្រីប្រមាន ២៦៥លាននាក់ ជាអ្នកលេងកីឡានេះ និងប្រមាណ ៣,៥ពាន់លាននាក់ ជាអ្នកគាំទ្រ ។

សម្ដេចតេជោ បានបន្តថា កម្ពុជាមានកីឡាករ កីឡាការិនី ដែលបានទទួលការនូវ​បណ្ដុះបណ្ដាល​ជំនាញ​កីឡាបាល់ទាត់ តាមក្លឹបបាល់ទាត់នានា​ ចំនួនប្រមាណ ២០០០នាក់ និងមានប្រមាណជាង ៣ ០០០នាក់ ជាក្រុមបាល់ទាត់មហាជន លេងដើម្បីសប្បាយរីករាយ និងសុខភាព ។ ដោយឡែក អ្នកគាំទ្រកីឡាបាល់ទាត់កម្ពុជា ​មានប្រមានជាង ១០ម៉ឺននាក់ ហើយការមកដល់ពានរង្វាន់បាល់ទាត់​ពិភពលោក នៅកម្ពុជានេះ បានបង្ហាញពីសុខ​សន្តិភាព និងសក្ដានុពលជាតិ​ ដែលពលរដ្ឋកម្ពុជា បាននិងកំពុងរស់នៅប្រកប​ដោយ​សុខដុមរមនា ទៅកាន់ពិភពលោក និងអ្នកគាំទ្របាល់ទាត់ជាង ៣០០០នាក់ ។

ជាមួយនេះ សម្ដេចតេជោ ហ៊ុន សែន បានបន្ថែមថា​ ក្នុងនាមរាជរដ្ឋាភិបាល សម្ដេចពិតជា​មាន​មោទនភាព ​ដូចប្រមុខរដ្ឋ ​ប្រមុខរាជរដ្ឋាភិបាលជាច្រើន ​ដែលបានកាន់ និងលើក​ពាន​រង្វាន់បាល់ទាត់ពិភពលោក ​ដ៏មានអត្ថន័យនេះ ៕ អត្ថបទ បាន សុខរិទ្ធិ