ភ្នំពេញ៖ សាកលវិទ្យាល័យភូមិន្ទភ្នំពេញ ចាប់ដៃគូរជាមួយវិស័យឯកជន ដើម្បីពង្រីកចំណេះដឹងលើផ្នែកបច្ចេកវិទ្យាជូនដល់និស្សិត ក្នុងការស្វែងយល់ និងការចាប់យកនូវប្រព័ន្ធបច្ចេកវិទ្យា សម្រាប់ជាមូលដ្ឋាននៃការអភិវឌ្ឍ ខណៈដែលពិភពលោក កំពុងចាប់យករបត់ថ្មីនេះ សម្រាប់ជាសសរស្ដម្ភនៃការពន្លឿនអភិវឌ្ឍន៍ប្រទេសជាតិ។
លោកបណ្ឌិត អោ វិទូ ប្រធានទទួលបន្ទុករួមមជ្ឈមណ្ឌលសហប្រតិបត្តិការសាកលវិទ្យាល័យ-សហគ្រាស នៃសាកលវិទ្យាល័យភូមិន្ទភ្នំពេញ បានលើកឡើងក្នុងកិច្ចសម្ភាសន៍ជាមួយសារព័ត៌មាន ស្តីពីការចុះអនុស្សារណៈយោគយល់គ្នា រវាងសាកលវិទ្យាល័យភូមិន្ទភ្នំពេញ និងក្រុមហ៊ុន វ៉ុនឌើរផាស តិចណូឡូជី (Worderpass technology) នៅថ្ងៃទី ១៤ ខែមិថុនា ឆ្នាំ២០២២ នេះថា ជុំវិញការសិក្សា សាកលវិទ្យាល័យភូមិន្ទភ្នំពេញ បានចុះអនុស្សារណៈជាមួយក្រុមហ៊ុនដៃគូរជាច្រើន ជាក់ស្តែងការចាប់ដៃគូរជាមួយក្រុមហ៊ុន វ៉ុនឌើរផាស តិចណូឡូជី នៅពេលនេះ គឺមានសារៈសំខាន់ណាស់ សម្រាប់ជួយធ្វើកាតឆ្លាតវៃមួយជូននិស្សិត ដើម្បីសម្គាល់ខ្លួនជានិស្សិត និងការប្រើប្រាស់កាតនេះ សម្រាប់ការទិញទំនិញផ្សេងៗ នៅក្នុងសាកលវិទ្យាល័យភូមិន្ទភ្នំពេញ និងក្រុមហ៊ុនដែលជាដៃគូររបស់ វ៉ុនឌើរផាសផងដែរ ។
លោក បន្តឲ្យដឹងថា ក្រៅពីគោលការណ៍ខាងលើ អ្វីដែលជាសារៈសំខាន់ ការចុះអនុស្សារណៈនេះ គឺជាពង្រីកបន្ថែមលើផ្នែកបច្ចេកវិទ្យាជូនដល់និស្សិត តាមរយៈការចុះធ្វើកម្មសិក្សា ការទទួលបានអត្ថប្រយោជន៍ការងារផ្សេងៗ។ ក្រៅពីនេះ ការចាប់ដៃគូរជាមួយ វ៉ុនឌើរផាស គឺជាកពង្រីកចំណេះដឹងលើផ្នែកបច្ចេកវិទ្យា ជូនដល់សាស្រ្តាចារ្យក្នុងការស្រាវជ្រាវ និងសិក្សាបន្ថែម ខណៈដែលវិស័យបច្ចេកវិទ្យា ត្រូវបានចាត់ទុកជាសសរស្ដម្ភយ៉ាងសំខាន់មិនអាចខ្វះបាន សម្រាប់ពន្លឿនការអភិវឌ្ឍប្រទេសនៅគ្រប់វិស័យ។
ចំណែកលោក ទុយ ច័ន្ទដារា នាយកប្រតិបត្តិក្រុមហ៊ុន វ៉ុនឌើរផាស តិចណូឡូជី លើកឡើងថា សម្រាប់សកម្មភាពការងារដែលក្រុមហ៊ុនកំពុងអនុវត្តនៅកម្ពុជា គឺជាផែនការស្របទៅនឹងទិសដៅរបស់រាជរដ្ឋាភិបាល ក្នុងគោលបំណងលើកកម្ពស់វិស័យតិចណូឡូជី ដើម្បីជម្រុញពង្រីកនៃការប្រើប្រាស់ប្រព័ន្ធបច្ចេកវិទ្យា ស្របតាមបរិបឋនៃការរីកចម្រើន ដែលពិភពលោកកំពុងចាប់យករបត់ថ្មីនេះ ដែលវាជាយានយ៉ាងសំខាន់ក្នុងការទំនាក់ទំនង និងការការធ្វើអាជីវកម្មផ្សេងៗ។
ដោយឡែកសម្រាប់និស្សិតនៅក្នុងសាកលវិទ្យាល័យភូមិន្ទភ្នំពេញវិញ ជំហានដំបូង ក្រុមហ៊ុននឹងជួយរៀបចំកាតវៃឆ្លាតដល់និស្សិត សម្រាប់ការទិញចំណីអាហារនៅក្នុងសាលារៀន និងចំណតយានយន្តជាដើម ក្នុងនោះក្រុមហ៊ុននឹងអនុវត្តតាមដំណាក់កាលជាបន្តបន្ទាប់ ដែលការអនុវត្តនេះ នឹងធ្វើឲ្យការប្រើប្រាស់តិចណូឡូជីនៅកម្ពុជា កាន់តែរីកចម្រើនពីមួយឆ្នាំទៅមួយឆ្នាំ។
សូមបញ្ជាក់ថា ការពិធីចុះអនុស្សារណៈយោគយល់គ្នានេះ បានធ្វើឡើងរវាង លោក ឈុន ហុក សាកលវិទ្យាធិការរង នៃសាកលវិទ្យាល័យភូមិន្ទភ្នំពេញ និងលោកស្រី ភូ លីនដា នាយិកាក្រុមហ៊ុន វ៉ុនឌើរផាស តិចណូឡូជី ដែលគម្រោងនេះនឹងអនុវត្តរយៈពេល ៥ឆ្នាំ ក្នុងនោះសម្រាប់ជំហានដំបូង គឺការរៀបចំធ្វើកាតវៃឆ្លាតជូននិស្សិត, ការចុះធ្វើកម្មវិធីសិក្សា និងជំហានបន្តបន្ទាប់ទៀត គឺការរៀបចំគម្រោងលើផ្នែកទេសចរណ៍ បង្ហាញអំពីព្រឹត្តិការណ៍ផ្សេងៗ លើសក្តានុពលវិស័យទេសចរណ៍នៅព្រះរាជាណាចក្រកម្ពុជា៕ អត្ថបទ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
