ភ្នំពេញ៖ មជ្ឈមណ្ឌលជាតិរក្សាសន្តិភាព នៅថ្ងៃទី១៥ ខែមិថុនានេះ បន្តបើកការចាក់វ៉ាកសាំងការពារកូវីដ១៩ ដូសទី៥ កម្លាំងរក្សាសន្តិភាព និងក្រុមគ្រួសារកម្លាំងរក្សាសន្តិភាពទាំងអស់។

ការចាក់វ៉ាក់សាំងដូសទី៥នេះ គឺផ្តោតសំខាន់ចាក់ជូនកម្លាំងរក្សាសន្តិភាពទាំងអស់ដែលត្រៀម​ចេញ​បេសកកម្មរក្សាសន្តិភាពអង្គការសហប្រជាជាតិUNនៅតាមបណ្តាប្រទេសកំពុងមានជម្លោះសង្គ្រាម។

គ្រូពេទ្យមមជ្ឈមណ្ឌលជាតិ លោក សុខ ចាន់ថន បានថ្លែងថា នៅក្នុងដំណើរការចាក់វ៉ាក់សាំង​ការ​ពារកូវីដ-១៩ ដូសទី៥ ដែលមានរយៈពេល៦ថ្ងៃ គិតចាប់ពីថ្ងៃទី១៣ ដល់ថ្ងៃទី១៨ ខែមិថុនានេះ ក្រុមពេទ្យមជ្ឈមណ្ឌលជាតិ បានផ្តល់ការចាក់វ៉ាក់សាំងជូនកងកម្លាំងរក្សាសន្តិភាពនៅក្នុងស្រុក និងកងម្លាំងថ្មីត្រៀមចេញបេសកកម្មទៅសាធារណរដ្ឋ​អាហ្រ្វឹក​កណ្តាល និង​ទៅបណ្តាប្រទេសនានា​ទៀត ហើយ​ក៏​មានក្រុម​គ្រួសារ​កង​កម្លាំង​រក្សា​សន្តិភាព​ជា​ច្រើន​ទៀត​ក៏បាន​អញ្ជើញ​មកចាក់ផងដែរ​ដើម្បី​ពង្រឹងប្រព័ន្ធភាពស៊ាំការពារកូវីដ១៩ នៅក្នុងខ្លួនអោយបានរឹងម៉ាំង។

លោក សុខ ចាន់ថន បានថ្លែងថា ក្រៅពីចាក់វ៉ាក់សាំងជូនកងកម្លាំងរក្សាសន្តិភាពនៅក្នុងស្រុក ប្រមុខ​ថ្នាក់ដឹកនាំ​រាជរដ្ឋាភិបាល​កម្ពុជា​ តាមរយៈអគ្គនាយកមជ្ឈមណ្ឌល​ជាតិរក្សាសន្តិភាព ក៏បាន​បញ្ជូនវ៉ាក់សំាងកូវីដ១៩ ជាច្រើនដូសទៀតយកទៅចាក់ជូនកងកម្លាំងរក្សាសន្តិភាពកម្ពុជាយើង ដែល​កំពុង​ឈរជើងបំពេញបេសកកម្មថែរក្សាសន្តិភាព​នៅក្រៅប្រទេសផងដែរ ខណៈបណ្តា​ប្រទេស​កំពុង​មា​ន​ជម្លោះ​សង្គ្រាម​ក៏កំពុងជួបប្រឈមការរាតត្បាតកូវីដ១៩​មិនទាន់​ធូរស្រាល​ផងដែរ។

សម្រាប់កងកម្លាំងថ្មី ត្រៀមបញ្ជូនបន្ថែម​ទៅសាធារណរដ្ឋ​អាហ្វឹ្រក​កណ្តាល ​បាន​ថ្លែងថា ការ​ចាក់វ៉ាក់​សាំងដូសទី៥​ គឺមាន​សារប្រយោជន៍​ក្នុងការពង្រឹងភាពស៊ាំការពារខ្លួនពីជំងឺកូវីដ១៩​ ហើយ​យើងក៏​សូមអរគុណខ្លាំង​ដល់ប្រមុខថ្នាក់ដឹកនាំរាជរដ្ឋាភិបាល​បានយកចិត្តទុក​ដាក់​ខ្ពស់ផ្តល់ការចាក់​វ៉ាក់សាំង​ដូសទី៥ មុន​នឹងចេញទៅបំពេញបេសកកម្មរក្សាសន្តិភាព​នៅអាហ្វឹ្រកកណ្តាល ហើយយើង​ក៏​ត្រូវបន្តការការពារខ្លួនអនុវត្តវិធានបីកុំបីការពារនៅក្នុងតំបន់បេសកកម្ម។

នាយឧត្តមសេនីយ៍​ សែម សុវណ្ណនី ​អគ្គនាយកមជ្ឈមណ្ឌលជាតិរក្សាសន្តិភាព​ បានថ្លែងថា បច្ចុប្បន្ន​កម្ពុជា​ មាន​ជំនឿទុក​ចិត្តខ្លាំង​លើ​ការ​ចាក់វ៉ាក់សាំងកូវីដ១៩ ជូនកម្លាំងមួកខៀវ ហើយដោយ​សារគ្រប់​បណ្តា​កម្លាំងមួកខៀវកម្ពុជា​ទាំងអស់បានចាក់វ៉ាក់សាំងនោះហើយ ទើបធ្វើឲ្យការបញ្ជូនទ័ពមួកខៀវ​កម្ពុជាមានសុខ​សុវត្ថិភាព ជាពិសេសក្នុងរយៈពេលជាង២ឆ្នាំកន្លងមកនេះពុំមាន​កងទ័ព​មួកខៀវ​កម្ពុជា​កើតឆ្លងជំងឺកូវីដ១៩ នៅក្នុងតំបន់បេសកកម្មនៅក្រៅប្រទេសនោះទេ៕ អត្ថបទ ស៊ុម សុខជា