ភ្នំពេញ៖ រាជរដ្ឋាភិបាលលកម្ពុជា នឹងដាក់ឱ្យដំណើរការអនុវត្តកម្មវិធីជំនួយសង្គមថ្មីមួយទៀត ក្នុងឆ្នាំ ២០២៣។ កម្មវីធិជំនួយសង្គមថ្មីនេះ គឺកម្មវិធីកញ្ចប់គ្រួសារ ដែលច្របាច់បញ្ចូល​នូវកម្មវិធីជំនួយ​សង្គមទាំងអស់ចូលគ្នា ​ហើយកម្មវិធីនេះជា កម្មវិធីអចិន្ត្រៃយ៍ដែលនឹងបើកផ្តល់សាច់ប្រាក់​ជូន​ក្រុមគោល​ដៅរៀងរាល់ខែ។

ឯកឧត្តម ឈួរ សុបញ្ញា ប្រតិភូរាជរដ្ឋាភិបាលទទួលបន្ទុក ជាអគ្គនាយក នៃមូលនិធិជាតិជំនួយសង្គម មានប្រសាសន៍ថា កម្មវិធីកញ្ចប់គ្រួសារ ​ជាកម្មវិធីជំនួយសង្គមថ្មីមួយ ដែលរាជរដ្ឋាភិបាលគ្រោងដាក់អនុវត្តក្នុងឆ្នាំ​ ២០២៣ ខាងមុខ។

បច្ចុប្បន្នក្រុមការងារបច្ចេកទេស​ បាននិងកំពុងរៀបចំក្នុងការត្រៀម ​អនុក្រឹត្យ ជា​ឯកសារចុងក្រោយ ដោយរង់ចាំ​ការឯកភាព ​និងឈានទៅប្រកាសគោលការណ៍​ដើម្បីអនុវត្ត។

ឯកឧត្តម បន្តថា កម្មវិធីជំនួយសង្គមថ្មីនេះ​ គឺជាការច្របាច់រួមគ្នានូវ ​កម្មវិធីជំនួយសង្គមទាំងអស់ ដោយក្រុមគោលដៅទទួលអត្ថប្រយោជន៍ រួមមាន ​ស្រ្តីមានផ្ទៃពោះ ​និងកុមារអាយុក្រោម ២ឆ្នាំ​ដែលក្រីក្រ ​ជនមានពិការភាពក្រីក្រ​ គ្រួសារផ្ទុកមេរោគអេដស៍ និងសិស្សក្រីក្រផងដែរ។

តាមផែនការ ទំហំថវិកាសម្រាប់ការអនុវត្តកម្មវិធីនេះ ឯកឧត្តម ​លើកឡើងថា​ ក្រុមការងារ កំពុង​ធ្វើការសិក្សាបន្ថែម។ចំពោះចំនួនថវិកា ​ដែលគ្រួសារ​ទទួលបាន គឺមានភាពខុសគ្នាទៅ​តាមចំនួន​សមាជិកក្នុងគ្រសារនីមួយៗ។ ជាក់ស្ដែងគ្រួសារដែលមានសមាជិកស្ថិតក្នុងក្រុមទទួលផល ចន្លោះបីទៅបួននាក់ ​គឺអាចទទួលបានថវិកាយ៉ាងតិច ​២០ម៉ឺនរៀលក្នុងមួយខែ។

បច្ចុប្បន្នរាជរដ្ឋាភិបាលកម្ពុជា បាននិងកំពុង​ បន្តអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និង​ងាយរងគ្រោះកំឡុងពេលប្រយុទ្ធប្រឆាំងកូវីដ-១៩។ ​កម្មវិធីនេះ​ ជាកម្មវិធីមិនអចិន្រ្តៃយ៍ ដែលអាច​នឹង​បញ្ចប់ក្នុងឆ្នាំ ២០២៣ ​ខាងមុខ។

កម្មវិធីនេះ ចាប់តាំងការអនុវត្ត កាលពីខែ មិថុនា ​ឆ្នាំ២០២០ រហូតមកដល់ ​ខែឧសភា ឆ្នាំ ២០២២ គឺរាជ​រដ្ឋាភិបាលកម្ពុជា​ ចំណាយថវិកាអស់ជាង ៦៨៣ លានដុល្លារ៕ អត្ថបទ៖ គឹមហុក