​បាល់ទាត់៖ ​លី​គ​បាល់ទាត់​អេ​ស្ប៉ា​ញ La Liga បានធ្វើ​ឯកសារ​រិះគន់ Manchester City និង Paris Saint Germain ទៅកាន់ UEFA ជុំវិញ​ការ​ចោត​ប្រកាន់​ថា​ ក្លិប​ទាំង​ពីរ​បាន​ប្រាស​ចាក​នឹង​គោល​ការណ៍ចាយវាយ​រឺ​ហៅថា Financial Fair Play​។

​​ប្រធាន La Liga លោក Javier Tebas បានធ្វើការ​រិះគន់​ម្តង​ហើយ​ម្តងទៀត​ទៅកាន់​ក្លិប​ទាំងពីរជុំវិញ​ការចាយវាយ ជាពិសេស​លើ PSG ដែល​បាន​ចាយលុយ​យ៉ាងច្រើន​ក្នុងការ​រក្សាទុក Kylian Mbappe មិនឱ្យ​ផ្ទេរចេញ​។ ​ជាមួយគ្នា​នោះដែរក្លិប​នៅ Premier League, Manchester City ក៏បាន​នាំយក​ខ្សែប្រយុទ្ធ​ណ័​រវេ​យ Erling Haaland ពី Dortmund ក្នុងតម្លៃ ៥១.២លាន​ផោន​។ ​​Real Madrid បាន​បរាជ័យ​ទាំងស្រុង​ក្នុង​ការចរចា​នាំយក​កីឡាករ​ទាំងពីរ​រូបនេះ​។ ​​ក្លិប​ទាំងពីរ Man City និង PSG តែងតែ​ការពារ​ខ្លួន​ជានិច្ច​ជុំវិញ​ការចោទប្រកាន់​របស់លោក Javier Tebas ដែលការរិះគន់​នេះ​មិនមែនជា​លើក​ទី១ ឡើយ​។

​កាលពី​ខែមេសា UEFA បានអនុម័ត​បទ​ប្បញ្ញត្តិ​ហិរញ្ញវត្ថុ​ថ្មី ​ដែល​រួមបញ្ចូល​ការខាតបង់​ទ្វេដង​នៃ​ចំនួន​ទឹកប្រាក់​ដែល​ក្លឹប​អាច​បាត់បង់​ក្នុង​រយៈពេល ៣ឆ្នាំ​ពី ៣០លាន​ទៅ ៦០លាន​អឺរ៉ូ ដោយ​ក្លឹប​មួយចំនួន​បានអនុញ្ញាត​ឱ្យ​បន្ថែម ១០លាន​អឺរ៉ូ​ប្រសិនបើ​ពួកគេ​មាន "​ស្ថានភាព​ហិរញ្ញវត្ថុ​ល្អ​"។​ ​ខែ​មុននេះ​ដែរ​លោក Tebas បាន​និយាយថា La Liga នឹង​ចាត់វិធានការ​ផ្លូវច្បាប់​ប្រឆាំងនឹង PSG បន្ទាប់ពី Mbappe ច្រានចោល​ការផ្ទេរ​ទៅ Real Madrid។​ ​កីឡាករ​ជំរើសជាតិ​បារាំង Kylian MBappe បាន​បន្ត​កុងត្រា​របស់គាត់​ជាមួយ PSG រហូតដល់​ឆ្នាំ២០២៥ ហើយ Tebas និង La Liga បាន​និយាយថា ​ការបន្ត​កិច្ចសន្យា​នេះ "​វាយប្រហារ​ស្ថិរភាព​សេដ្ឋកិច្ច​" នៃ​បាល់ទាត់​អឺរ៉ុប​៕

​អត្ថបទ​៖​នាង សុភា​វុ​ធ