ភ្នំពេញ៖ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានណែនាំឲ្យអាជ្ញាធរនៅទូទាំងប្រទេស រក្សាសណ្ដាប់ធ្នាប់ សន្តិសុខ ក្នុងឱកាសប្រារព្ធព្រះរាជពិធីចម្រើនព្រះជន្ម សម្ដេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្ដីថ្លៃថ្នូរ និងសុភមង្គល គម្រប់ព្រះជន្ម៨៦ យាងចូល៨៧ព្រះវស្សា។

សេចក្តីណែនាំសម្ដេចក្រឡាហោម បានជំរុញឲ្យអាជ្ញាធរបង្កើនវិធានការសន្តិសុខ និងសណ្តាប់ធ្នាប់សាធារណៈឱ្យបានម៉ឺងម៉ាត់ តាមបណ្តាគោលដៅប្រារព្ធពិធីបុណ្យ និងគោលដៅកម្សាន្តសប្បាយរបស់ប្រជាពលរដ្ឋ ដូចជាទីវត្តអារាម ប្រាង្គប្រាសាទ បូជនីយដ្ឋាន រមណីយដ្ឋាន គោលដៅទេសចរណ៍នានា ដើម្បីរក្សានូវសណ្តាប់ធ្នាប់ឱ្យបានល្អប្រសើរ និងរៀបចំចាត់ចែងអុជកាំជ្រួច នៅយប់ថ្ងៃទី១៨ ខែមិថុនា ឆ្នាំ២០២២ ដើម្បីអបអរសាទរ ទិវាដ៏ឧត្ដុង្គឧត្ដមនេះ។ 

សម្តេចបានសង្កត់ធ្ងន់ថា “ទប់ស្កាត់ និងបង្ក្រាបឱ្យបានទាន់ពេល នូវរាល់សកម្មភាពដែលនាំឱ្យគ្រោះថ្នាក់ បង្កការភ័យខ្លាចដល់ ប្រជាពលរដ្ឋ នឹងនាំឱ្យជះឥទ្ធិពលមិនល្អដល់កិត្តិយស សេចក្ដីថ្លៃថ្នូររបស់សង្គមជាតិ ដូចជាសកម្មភាពក្មេងទំនើង អំពើហិង្សា ការប្រើប្រាស់អាវុធ គ្រឿងផ្ទុះគ្រាប់រំសេវ និងល្បែងស៊ីសងគ្រប់ប្រភេទ” ។ 

សម្ដេចក្រឡាហោម បានជំរុញឲ្យរឹតបន្តឹងការអនុវត្តច្បាប់ចរាចរណ៍ផ្លូវគោក និងមានផែនការជាមុនក្នុងការរៀបចំសណ្តាប់ធ្នាប់ សម្រួលចរាចរណ៍តាមបណ្ដាផ្លូវជាតិ ទីប្រជុំជន ដូចជាគោលដៅផ្សេងៗ ដែលមានមនុស្សប្រមូលផ្តុំដើម្បីរៀបចំរបៀបរៀបរយ សណ្ដាប់ធ្នាប់ កាត់បន្ថយបាននូវការកកស្ទះ និងគ្រោះថ្នាក់ដែលអាចកើតឡើងជាយថាហេតុ ត្រូវយកចិត្តទុកដាក់អប់រំប្រជាពលរដ្ឋ ឱ្យមានស្មារតីប្រុងប្រយ័ត្នគ្រោះអគ្គិភ័យ គ្រោះមហន្តរាយនានា ដោយរៀបចំកម្លាំង និងមធ្យោបាយត្រៀមបម្រុងប្រចាំការ ២៤/២៤ម៉ោង ដើម្បីសហការជួយសង្គ្រោះ ពេលមានអគ្គិភ័យ និងគ្រោះធម្មជាតិដែលកើតឡើងជាយថាហេតុ ៕